नागपूर : मानकापूर पोलीस ठाण्याच्या हद्दीतील ताजनगर परिसरात तलवार आणि चाकू लहरवत ७ ते ८ तरुणांनी दहशत निर्माण केल्याची घटना समोर आली आहे. ३० ऑगस्टच्या रात्री घडलेल्या या प्रकारामुळे परिसरातील नागरिकांमध्ये काही काळ भीतीचे वातावरण निर्माण झाले. या प्रकरणी मानकापूर पोलिसांनी सोनू पिल्लेवार याच्यासह ७ ते ८ जणांविरुद्ध गुन्हा दाखल केला असून, सर्व संशयितांचा शोध सुरू आहे.
नेमके काय घडले?
ताजनगर येथील गल्ली क्रमांक ८ मध्ये ३ ते ४ दुचाकींवरून ७ ते ८ तरुण आले. त्यांच्या हातात तलवार आणि चाकू असल्याचे तक्रारीत नमूद करण्यात आले आहे. आरोपींनी परिसरात फिरत नागरिकांना धमकावल्याचा आरोप आहे.
तक्रारदार रकीब खान हे जेवण झाल्यानंतर घराबाहेर आले असता त्यांना मोठमोठ्याने आवाज ऐकू आला. रस्त्यावर गेल्यानंतर त्यांना दुचाकींवरून फिरणारे तरुण दिसले. यातील तिघांनी तक्रारदाराजवळ येऊन तलवार आणि चाकू दाखवत धमकावल्याचे सांगण्यात आले आहे.
यानंतर संबंधित तरुण दुचाकींवरून परिसरात फिरत राहिले आणि हातातील शस्त्रे लहरवत नागरिकांमध्ये दहशत निर्माण केल्याचा आरोप आहे.
जुन्या वादातून हंगामा?
पोलिसांच्या प्राथमिक माहितीनुसार, परिसरातील राहुल कटोते आणि बिल्लू यांचा कोणाशी तरी वाद झाला होता. याच वादातून राहुल कटोते याचा मेहुणा सोनू पिल्लेवार आणि त्याच्या साथीदारांनी हा प्रकार केल्याचा पोलिसांना संशय आहे.
या प्रकरणी मानकापूर पोलिसांनी भारतीय न्याय संहितेतील विविध कलमांसह भारतीय शस्त्र अधिनियमाच्या तरतुदींनुसार गुन्हा दाखल केला आहे. अद्याप कोणालाही अटक करण्यात आलेली नसून संशयितांचा शोध घेण्यासाठी पोलिसांकडून तपास सुरू आहे.मानकापूर पोलीस ठाण्याचे हरेश कालसेकर यांनी या प्रकरणाचा पुढील तपास सुरू असल्याचे सांगितले.
