नागपूर : राज्यातील विविध प्रलंबित मागण्यांसाठी आज नागपूरात सरकारी तसेच निमसरकारी शिक्षक-शिक्षकेत्तर कर्मचाऱ्यांनी एकत्र येत जोरदार आंदोलन छेडले. सरकारी-निमसरकारी शिक्षक-शिक्षकेत्तर कर्मचारी समन्वय समिती, महाराष्ट्र आणि राज्य सरकारी कर्मचारी मध्यवर्ती संघटना यांच्या नेतृत्वाखाली हजारो कर्मचारी संविधान चौकात एकवटले.
आंदोलनादरम्यान कर्मचाऱ्यांनी राज्य सरकारविरोधात तीव्र घोषणाबाजी करत आपल्या मागण्यांकडे तातडीने लक्ष देण्याची मागणी केली. दीर्घकाळापासून प्रलंबित असलेल्या प्रश्नांवर सरकारकडून ठोस निर्णय घेतला जात नसल्याचा आरोपही यावेळी करण्यात आला.
कर्मचाऱ्यांच्या प्रमुख मागण्यांमध्ये जुनी पेन्शन योजना पुन्हा लागू करणे, वेतनातील विसंगती दूर करणे, तसेच कंत्राटी कर्मचाऱ्यांना कायमस्वरूपी सेवेत समाविष्ट करणे या मुद्द्यांचा समावेश आहे. या मागण्या मान्य न झाल्यास आंदोलन अधिक तीव्र करण्याचा इशाराही आंदोलकांनी दिला.
दरम्यान, या बेमुदत संपामुळे राज्यातील शासकीय कामकाजावर परिणाम होण्याची शक्यता वर्तवली जात आहे. नागरिकांना विविध शासकीय सेवांमध्ये अडचणींचा सामना करावा लागू शकतो, अशी स्थिती निर्माण झाली आहे.
