नागपूर : शहरातील गुन्हेगारी आणि अवैध धंद्यांविरोधात नागपूर गुन्हे शाखेने धडक मोहीम राबवली आहे. ८ आणि ९ सप्टेंबरदरम्यान गुन्हे शाखेच्या विविध पथकांनी शहरातील वेगवेगळ्या भागांत तब्बल १८ कारवाया करत २१ आरोपी व वांछित आरोपींवर कारवाई केली. या कारवायांमध्ये ३० लाख ८५ हजार रुपयांहून अधिक किमतीचा मुद्देमाल जप्त करण्यात आला.
गुन्हे शाखेचे पोलीस उपायुक्त दीपक अग्रवाल यांच्या मार्गदर्शनाखाली करण्यात आलेल्या या कारवायांमध्ये प्रतिबंधित नायलॉन मांजा, जुगार, अवैध दारू, बेकायदा शस्त्रे, वाहन चोरी, चोरीच्या वाहनांचे सुटे भाग आणि सेंधमारीच्या गुन्ह्यातील आरोपींना लक्ष्य करण्यात आले.
यशोधरानगर परिसरात सामाजिक सुरक्षा पथक आणि एएचटीयू पथकाने गुप्त माहितीच्या आधारे कारवाई करत प्रतिबंधित मोनो काइट नायलॉन मांजाचे १८० नग जप्त केले. या मांजाची किंमत सुमारे ५ लाख ४० हजार रुपये आहे. याशिवाय १ लाख २० हजार रुपयांची ई-रिक्षा, ७५ हजार रुपयांची सुजुकी मोपेड आणि मोबाईल असा एकूण ७ लाख ४५ हजार रुपयांचा मुद्देमाल पोलिसांनी जप्त केला. या प्रकरणात एका आरोपीवर कारवाई करण्यात आली असून फैजान अन्सारी हा वांछित आरोपी असल्याचे समोर आले आहे.
Gold Rate
Sept 09,2026 - Time 10.30Hrs
दरम्यान, वाहन चोरी विरोधी पथकाने कपिलनगर परिसरात कारवाई करत विविध वाहनांचे ३० ते ४० इंजिन तसेच इतर सुटे भाग जप्त केले. या मालाची किंमत सुमारे ३० लाख रुपये असल्याचे पोलिसांनी सांगितले. यासोबतच एमएच-४०-बीजी-४९३७ क्रमांकाचा ट्रकही ताब्यात घेण्यात आला.
बेलतरोडी परिसरातील प्रवासी बस चोरीच्या प्रकरणाचाही पोलिसांनी छडा लावला. वाहन चोरी विरोधी पथकाने दोन आरोपींना ताब्यात घेत टाटा कंपनीची मिनीबस जप्त केली. तर गिट्टीखदान परिसरात सेंधमारीच्या गुन्ह्यातील वांछित आरोपीला गुन्हे शाखेच्या युनिट क्रमांक ६ ने पकडले. त्याच्याकडून सुमारे १६ हजार रुपये किमतीचे चांदीचे दागिने जप्त करण्यात आले.
जुगारविरोधी कारवाईत राणाप्रतापनगर, सक्करदरा, सदर, हुडकेश्वर आणि नंदनवन परिसरात पाच ठिकाणी छापे टाकण्यात आले. या कारवायांमध्ये सहा जणांवर कारवाई करून रोख रक्कम आणि जुगाराचे साहित्य जप्त करण्यात आले. त्याचबरोबर सक्करदरा, गिट्टीखदान, खापरखेडा आणि कपिलनगरसह विविध भागांत अवैध दारू विक्रीविरोधात पाच कारवाया करण्यात आल्या.
वाडी आणि इमामवाडा परिसरात बेकायदा शस्त्र बाळगणाऱ्या दोन आरोपींना पकडण्यात आले. त्यांच्या ताब्यातून लोखंडी चाकू जप्त करण्यात आले. तसेच लकडगंज परिसरात संशयास्पद हालचालींवरून महाराष्ट्र पोलीस अधिनियमाच्या कलम १२२(अ) अंतर्गत दोन प्रतिबंधात्मक कारवाया करण्यात आल्या.
गुन्हे शाखेच्या या सलग कारवायांमुळे शहरातील अवैध धंदे आणि गुन्हेगारी कारवायांवर पोलिसांचा कडक वचक निर्माण झाल्याचे दिसून येत आहे. आगामी काळातही गुन्हेगारी तसेच बेकायदा व्यवसायांविरोधात कारवाई अधिक तीव्र करण्यात येणार असल्याचे पोलिसांकडून सांगण्यात आले.
