नागपूर : उपराजधानी नागपूरमध्ये गुन्हेगारीच्या क्षेत्रात आता अल्पवयीन मुलांची संख्याही झपाट्याने वाढू लागली आहे. गेल्या अडीच वर्षांत २०० हून अधिक बालगुन्हेगार विविध गंभीर गुन्ह्यांमध्ये सहभागी असल्याचे उघड झाले आहे. चोरी, लूट, आणि हत्या यांसारख्या गंभीर प्रकारांच्या गुन्ह्यांमध्येही आता अल्पवयीनांची सहभागिता वाढली आहे.
चार महिन्यांपूर्वी एका गुन्हेगारी जगतातील कुख्यात व्यक्तीच्या हत्येप्रकरणी पोलिसांनी १७ वर्षीय बालगुन्हेगाराला अटक केली होती. सुधारगृहातून परतल्यानंतर काही काळातच त्याने पुन्हा गुन्हेगारीकडे वळत लूट आणि चोरीचे प्रकार सुरू केले.
Gold Rate
29 April 2025
सर्वात धक्कादायक प्रकार म्हणजे या अल्पवयीन गुन्हेगाराने आपल्या तिघा नाबालिग मित्रांसह मिळून केवळ १५ लाख रुपयांच्या सुपारीसाठी एका प्रॉपर्टी डिलरची निर्घृण हत्या केली. चार महिन्यांत त्याने दुसऱ्यांदा खून केल्यामुळे पोलिस यंत्रणेत खळबळ उडाली आहे.
पोलीस आयुक्त डॉ. रविंद्रकुमार सिंगल यांच्या मार्गदर्शनाखाली पोलिसांनी आता अशा सक्रिय बालगुन्हेगारांची स्वतंत्र यादी तयार केली आहे. कपिल नगर, जरीपटका, अजनी, हुडकेश्वर, सक्करदरा, नंदनवन, गिट्टीखदान आणि अंबाझरी या परिसरात बालगुन्हेगारांचे प्रमाण सर्वाधिक असल्याचे निष्पन्न झाले आहे.
उपाययोजना काय –
हा वाढता कल समाजासाठी चिंतेचा विषय ठरत आहे. पोलिस प्रशासनाने या समस्येकडे गांभीर्याने पाहण्यास सुरुवात केली असून, कठोर उपाययोजना राबवण्याचे आणि बालगुन्हेगारांवर नियंत्रण मिळवण्यासाठी विशेष योजना आखण्याचे संकेत दिले आहेत.
मात्र, या समस्येची मुळे केवळ कायद्याच्या चौकटीत न बसता सामाजिक, आर्थिक व कौटुंबिक स्तरावरही शोधावी लागणार आहेत, असे तज्ज्ञांचे मत आहे. ही केवळ पोलिस यंत्रणेची नाही, तर संपूर्ण समाजाची सामूहिक जबाबदारी आहे. बालगुन्हेगारीवर नियंत्रण ठेवण्यासाठी वेळेवर योग्य दिशादर्शन, शिक्षण आणि मार्गदर्शनाची आवश्यकता अधिक तीव्रतेने जाणवत आहे.
