नागपूर : सोशल मीडियावर भडकावू आणि कायदा-सुव्यवस्थेला बाधा पोहोचवणारा मजकूर प्रसारित करणाऱ्यांविरोधात नागपूर पोलिसांनी कठोर भूमिका घेतली आहे. अवैध पिस्तूल बाळगल्याप्रकरणी नुकताच जामिनावर बाहेर आलेल्या एका आरोपीने सोशल मीडियावर आक्षेपार्ह व्हिडिओ पोस्ट केल्याने पोलिसांनी त्याला पुन्हा अटक करून तुरुंगात पाठविले.
मिळालेल्या माहितीनुसार, अटक करण्यात आलेल्या आरोपीचे नाव अमीन पटेल असून तो नागपूरच्या हसनबाग परिसरातील रहिवासी आहे. सुमारे चार महिन्यांपूर्वी अवैध पिस्तूल बाळगल्याप्रकरणी त्याला अटक करण्यात आली होती. त्यानंतर जामिनावर सुटका झाल्यानंतर भविष्यात कोणत्याही गुन्हेगारी कृत्यात सहभागी होणार नसल्याचे त्याने वैयक्तिक हमीपत्राद्वारे पोलिसांना आश्वासन दिले होते.
Gold Rate
Sept 12,2026 - Time 10.30Hrs
मात्र, तुरुंगातून बाहेर आल्यानंतर काही दिवसांतच त्याने सोशल मीडियावर कथितरित्या भडकावू स्वरूपाचा व्हिडिओ प्रसारित केला. याची माहिती मिळताच नंदनवन पोलिसांनी त्याच्या घरावर छापा टाकला. घराची झडती घेतली असता आरोपीकडून एक चाकू जप्त करण्यात आला. त्यानंतर पोलिसांनी त्याला पुन्हा अटक करून न्यायालयात हजर केले असून त्याची रवानगी तुरुंगात करण्यात आली.
याप्रकरणी नंदनवन पोलिस ठाण्याचे वरिष्ठ पोलिस निरीक्षक कैलास देशमाने यांनी सांगितले की, सोशल मीडियावर समाजात तेढ निर्माण करणारे किंवा कायदा-सुव्यवस्थेला बाधा आणणारे मजकूर, व्हिडिओ अथवा पोस्ट करणाऱ्यांवर कठोर कारवाई सुरूच राहणार आहे. नागरिकांनी सोशल मीडियाचा जबाबदारीने वापर करावा आणि कोणत्याही प्रकारच्या आक्षेपार्ह किंवा भडकावू पोस्ट टाळाव्यात, असे आवाहनही त्यांनी केले आहे.
