कामठी : नागपूर जिल्ह्यातील कामठी शहरात सोमवारी एका पिसाळलेल्या कुत्र्याने अक्षरशः धुमाकूळ घालत वृद्ध, महिला आणि लहान मुलांसह १३ जणांना चावा घेतल्याची घटना घडली. या हल्ल्यात जखमी झालेल्यांपैकी दोघांची प्रकृती गंभीर असल्याची माहिती समोर आली आहे. सर्व जखमींवर कामठी उपजिल्हा रुग्णालयात उपचार सुरू आहेत.
मिळालेल्या माहितीनुसार, सोमवारी सकाळी सुमारे ११ वाजताच्या सुमारास पांढऱ्या रंगाचा हा कुत्रा शहरातील विविध भागांत फिरत होता. यावेळी त्याने अचानक नागरिकांवर हल्ले करण्यास सुरुवात केली. या हल्ल्यात काहींना हातावर, तर काहींना पायावर व शरीराच्या इतर भागांवर गंभीर जखमा झाल्या.
घटनेनंतर जखमींना तातडीने कामठी उपजिल्हा रुग्णालयात दाखल करण्यात आले. सतत होत असलेल्या हल्ल्यांमुळे शहरात भीती आणि दहशतीचे वातावरण निर्माण झाले होते.
घटनेची माहिती मिळताच नगर परिषदेचे पदाधिकारी दिलीप बाडेबुचे आणि नगरसेविका मनीषा नागपुरे यांनी रुग्णालयात भेट देऊन जखमींची विचारपूस केली. त्यानंतर नगर परिषद अध्यक्ष अजय अग्रवाल आणि मुख्याधिकारी विनोद जाधव यांना माहिती देऊन तातडीने कारवाईची मागणी करण्यात आली.
नगर परिषदेचे पथक आणि स्थानिक युवकांनी संयुक्तपणे कुत्र्याचा शोध सुरू केला. अखेर मोंढा- कामठी परिसरात रात्री उशिरा मोठ्या प्रयत्नांनंतर त्या पिसाळलेल्या कुत्र्याला पकडण्यात यश आले. त्यामुळे नागरिकांनी सुटकेचा निश्वास सोडला.
दरम्यान, जखमींवर उपचार सुरू असून आरोग्य विभागाने नागरिकांना सतर्क राहण्याचे आवाहन केले आहे. तसेच शहरातील भटक्या आणि संशयित कुत्र्यांवर विशेष लक्ष ठेवण्यात येणार असल्याचे आश्वासन नगर परिषदेकडून देण्यात आले आहे.
