नागपूर : नागपूर महानगरपालिकेच्या वतीने मंगळवारी झोन अंतर्गत पोलिस लाईन टाकळी पेन्शन नगर येथे महापौर नेत्र तथा दंत तपासणी शिबिराचे आयोजन करण्यात आले होते.
शिबिराचे उद्घाटन माजी आमदार सुधाकर देशमुख यांच्या हस्ते झाले. यावेळी ज्येष्ठ नगरसेवक सुनील अग्रवाल, वैद्यकीय आरोग्य अधिकारी डॉ. नरेंद्र बहिरवार, अतिरिक्त सहाय्यक वैद्यकीय आरोग्य अधिकारी डॉ. विजय जोशी उपसथित होते.
Gold Rate
Apr 08,2026 - Time 10.30Hrs
महापौरांच्या संकल्पनेने व पुढाकाराने ‘आझादी -७५’ अंतर्गत संपूर्ण शहरामध्ये आरोग्य शिबीर ७५ दंत तपासणी शिबिर घेण्यात येणार आहेत. शहरातील नागरिकांचे आरोग्य सुदृढ राहावे यासाठी नागपूर महानगरपालिका आरोग्य यंत्रणा बळकट करीत आहे. सोबतच आर्थिकदृष्ट्या कमकुवत घटकांना प्रत्येक आरोग्य सोयीचा लाभ मिळावा यासाठी शहरातील विविध भागात शिबीर आयोजित करण्यात येत आहे. महापौर नेत्र ज्योती योजना, महापौर दृष्टी सुधार योजना आदींच्या माध्यमातून गरजूंना महात्मे नेत्र पेढीच्या सहकार्याने मोफत शस्त्रक्रियेचा लाभ देण्यात येत आहे.
शिबिरात सहभागी झालेल्या नागरिकांची बाह्य रोग तपासणी तसेच दंत तपासणी शासकीय दंत चिकित्सा महाविद्यालयाच्या चमूने केली. तपासणीनंतर आवश्यकता असणा-या व्यक्तींच्या दातांची सफाई, फिलिंग सुद्धा दंत महाविद्यालयाच्या चमूद्वारे करण्यात आली. तपासणीमध्ये मुख कर्करोगाचा धोका असलेल्यांना आवश्यक मार्गदर्शनही करण्यात आले.
शिबिरामध्ये दातांची स्वच्छता, दातांमध्ये फिलिंग करणे, दात काढणे, कॅन्सरच्या धोक्याबाबत तपासणीद्वारे योग्य माहिती देण्यात आली. दातांसाठी पुढील उपचार शासकीय दरात शासकीय दंत महाविद्यालय व रुग्णालयामध्ये करण्यात येतील. यासाठी तेथे शिबिराच्या माध्यमातून येणा-या रुग्णांसाठी स्वतंत्र कक्ष व वेगळी व्यवस्था सुद्धा करण्यात येणार आहे. आरोग्य तपासणी शिबिराच्या माध्यमातून तपासणी करण्यात आल्यानंतर आवश्यक त्या रुग्णांना मोफत औषधांचे वाटपही करण्यात आले.
नेत्र तपासणी शिबिरामध्ये नेत्र तपासणी करण्यात आली. ज्या नागरिकांना पुढील उपचार अथवा शस्त्रक्रियेची गरज आहे, त्यांना आवश्यक माहिती देण्यात आली. याशिवाय नागरिकांची आरोग्य तपासणी करून त्यांना निःशुल्क औषध वितरण करण्यात आले.
