नागपूर : तहसील पोलीस ठाण्याच्या हद्दीतील डागा रुग्णालयातून अवघ्या एक दिवसाच्या नवजात बालिकेच्या बेपत्ता होण्याची धक्कादायक घटना समोर आली आहे. बालिका अचानक गायब झाल्याने रुग्णालयात एकच खळबळ उडाली असून, तहसील पोलिसांनी तातडीने तपास सुरू केला आहे.
रुग्णालयात दाखल असलेल्या महिलेने नुकतीच एका बालिकेला जन्म दिला होता. मात्र, जन्मानंतर अवघ्या एका दिवसातच बालिका बेपत्ता झाल्याचे लक्षात येताच कुटुंबीयांनी रुग्णालय परिसरात शोध घेतला. बालिकेचा ठावठिकाणा न लागल्याने पोलिसांना माहिती देण्यात आली.
Gold Rate
Sept 07 ,2026 - Time 10.30Hrs
घटनेचे गांभीर्य लक्षात घेऊन पोलिसांनी रुग्णालयातील आणि परिसरातील सीसीटीव्ही चित्रण तपासण्यास सुरुवात केली आहे. रुग्णालयात ये-जा करणाऱ्या व्यक्ती, कर्मचारी तसेच रुग्णांच्या नातेवाईकांचीही चौकशी केली जात आहे.
तपासादरम्यान बुरखा घातलेल्या एका संशयित महिलेच्या हालचाली पोलिसांच्या निदर्शनास आल्याची माहिती आहे. मात्र, या महिलेबाबत पोलिसांकडून अद्याप अधिकृत माहिती अथवा ओळख स्पष्ट करण्यात आलेली नाही. तिच्या हालचाली आणि रुग्णालयातून बाहेर जाण्याच्या मार्गाची माहिती सीसीटीव्हीच्या माध्यमातून तपासली जात आहे.
बालिकेला रुग्णालयाबाहेर नेण्यात आले असण्याची शक्यता लक्षात घेऊन पोलिसांनी परिसरातील रस्ते, गल्ली तसेच प्रमुख मार्गांवरील सीसीटीव्ही चित्रणाचीही तपासणी सुरू केली आहे. घटनेच्या वेळी रुग्णालयात उपस्थित असलेल्या व्यक्तींकडून माहिती घेतली जात आहे.
अवघ्या एका दिवसाच्या नवजात बालिकेच्या बेपत्ता होण्याने कुटुंबीयांमध्ये चिंतेचे वातावरण निर्माण झाले आहे. बालिका सुरक्षितपणे मिळावी, यासाठी पोलिसांकडून विविध दिशेने तपास सुरू असून, लवकरच घटनेचा उलगडा होण्याची शक्यता आहे.
