नागपूर : लकडगंज परिसरात पावभाजी संपल्याच्या कारणावरून झालेल्या वादातून एका तरुणाने विक्रेत्यावर कटरने हल्ला केल्याची घटना घडली. आरोपीने विक्रेत्याच्या मानेवर हल्ला करण्याचा प्रयत्न केला. मात्र, विक्रेत्याने प्रसंगावधान राखत हल्ला चुकवला. यावेळी कटर गालावर लागल्याने विक्रेता गंभीर जखमी झाला.
भालचंद्र यादव (४४) हे पावभाजी विक्रीचा व्यवसाय करतात. घटनेच्या रात्री काम आटोपून यादव घरी परतले होते. गाडीला कुलूप लावत असताना परिसरात राहणारा आरोपी त्यांच्याकडे आला आणि त्याने पावभाजी मागितली. मात्र, पावभाजी संपल्याचे यादव यांनी सांगितल्याने आरोपी संतप्त झाला.
आरोपीने यादव यांची कॉलर पकडून शिवीगाळ करण्यास सुरुवात केली. वाद वाढल्यानंतर त्याने कटर काढून यादव यांच्या मानेवर हल्ला करण्याचा प्रयत्न केला. यादव यांनी हल्ला चुकवला, मात्र कटर त्यांच्या गालावर लागल्याने ते जखमी झाले.
घटनेनंतर परिसरातील नागरिकांनी यादव यांना तातडीने मेयो रुग्णालयात दाखल केले. उपचारानंतर त्यांनी लकडगंज पोलीस ठाण्यात तक्रार दाखल केली. तक्रारीच्या आधारे पोलिसांनी आरोपीविरुद्ध गुन्हा दाखल केला असून पुढील तपास सुरू आहे.
