नागपूर : थकीत संपत्ती कराच्या वसुलीसाठी नागपूर महानगरपालिकेने तब्बल 41 दिवस विशेष मोहीम राबवली. बड्या थकबाकीदारांवर कारवाईचा इशारा देत 1000 कोटी रुपयांचे वसुलीचे लक्ष्य ठेवण्यात आले होते. मात्र, अभियान संपल्यानंतर मनपाच्या हाती केवळ 50 कोटी 4 लाख 4 हजार 391 रुपये आले. त्यामुळे उद्दिष्टाच्या तुलनेत वसुली अवघी सुमारे 5 टक्केच झाली.
नागपूर मनपाच्या कर विभागाने 20 ऑगस्ट ते 30 सप्टेंबर या कालावधीत ही विशेष वसुली मोहीम राबवली. मनपा आयुक्त डॉ. विपिन इटनकर यांनी अधिकाऱ्यांच्या बैठका घेऊन थकबाकीदारांकडून प्रभावीपणे कर वसूल करण्याचे निर्देश दिले होते.
या मोहिमेदरम्यान थकबाकीदारांचे पाणी कनेक्शन तोडणे, मालमत्ता किंवा साहित्य जप्त करणे तसेच आवश्यकतेनुसार मालमत्ता लिलावात काढण्याची कारवाई करण्याचे अधिकार अधिकाऱ्यांना देण्यात आले होते. तरीही अपेक्षित प्रमाणात कर वसुली होऊ शकली नाही.
नागपूर मनपाकडे 1279 कोटींची थकबाकी-
मनपाच्या आकडेवारीनुसार, संपत्ती कराची एकूण थकबाकी 1279 कोटी 5 लाख रुपये आहे. यापैकी 683 कोटी 66 लाख रुपये मूळ कराची रक्कम असून, तब्बल 586 कोटी 70 लाख रुपये दंडाच्या स्वरूपात आहेत. याशिवाय 8 कोटी 69 लाख रुपये वॉरंट शुल्काची थकबाकी आहे.
लक्ष्मीनगरची वसुली सर्वाधिक-
जोननिहाय वसुलीत लक्ष्मीनगर जोनने 10 कोटी 91 लाख रुपयांची वसुली करत आघाडी घेतली. हनुमाननगरमधून 5 कोटी 83 लाख, धंतोलीतून 5 कोटी 61 लाख, लकडगंजमधून 4 कोटी 99 लाख, धरमपेठमधून 4 कोटी 50 लाख आणि आसीनगरमधून 4 कोटी 26 लाख रुपये वसूल झाले. मनपा मुख्यालयातून 89.64 लाख रुपयांची वसुली नोंदवण्यात आली.
50 टक्के दंडमाफीची मागणी मात्र प्रलंबित-
थकीत करावरील दंडाची रक्कम मोठी असल्याने बकायादारांना दिलासा देण्यासाठी दंडात सवलत देण्याची मागणी करण्यात आली होती. कर समितीच्या सभापती सरिता कावरे यांच्यासह भाजपच्या काही नगरसेवकांनी दंडाच्या रकमेत 50 टक्के सवलत देण्याची मागणी केली होती. मात्र, या मागणीवर अद्याप एकमत झालेले नाही. दंडमाफीचा निर्णय न झाल्याने बकायादारांकडून कर भरण्यास अपेक्षित प्रतिसाद मिळाला नसल्याचे सांगितले जात आहे.
