नागपूर: अल्पवयीन मुलीचे कथित अपहरण आणि लैंगिक अत्याचार प्रकरणातील 20 वर्षीय आरोपीच्या लॉकअपमधील वर्तनामुळे पोलिसांसमोर नवा प्रश्न निर्माण झाला आहे. अटकेनंतरही आरोपीने पोलिस कोठडीत विशेष सुविधा देण्याची मागणी केल्याची माहिती समोर आली आहे.
पोलिसांच्या माहितीनुसार, बीबीएचा विद्यार्थी असलेल्या या आरोपीने लॉकअपमध्ये पिझ्झा, उशी, मऊ गादी आणि डासांपासून बचावासाठी मॉस्किटो रिपेलंटची मागणी केली. लॉकअपमधील अस्वच्छ भिंती, दुर्गंधीयुक्त शौचालय आणि डासांचा त्रास याबाबत त्याने तक्रारी केल्या आहेत.
Gold Rate
Sept 17,2026 - Time 10.30Hrs
चौकशीदरम्यान सहकार्य करण्याऐवजी आरोपी सातत्याने सुविधांबाबत आक्षेप घेत असल्याचे पोलिसांचे म्हणणे आहे. पीडित मुलीकडून ताब्यात घेतलेला मोबाईल आणि स्वतःच्या मोबाईलचा पासवर्ड देण्यासही त्याने नकार दिल्याने डिजिटल पुरावे गोळा करताना अडचणी येत असल्याचे तपास यंत्रणेने सांगितले.
पोलिसांनी दिलेल्या माहितीनुसार, आरोपीने सुरुवातीला वैद्यकीय तपासणी आणि उपचारांनाही विरोध केला होता. मात्र, अखेर मंगळवारी त्याला वैद्यकीय तपासणीसाठी नेण्यात आले. चौकशीदरम्यान विचारलेल्या प्रश्नांना तो टाळाटाळ करत असून, आपल्या कृत्यांसाठी पीडित मुलीलाच जबाबदार ठरवण्याचा प्रयत्न करत असल्याचा आरोप पोलिसांनी केला आहे.
न्यायालयात पोलिसांवर गंभीर आरोप-
मंगळवारी विशेष न्यायालयात हजर केल्यानंतर आरोपीने पोलिसांवर गंभीर आरोप केले. पोलिसांनी त्याच्या भाड्याच्या घरातून 70 हजार रुपये रोख रक्कम घेतल्याचा, मारहाण केल्याचा तसेच चष्मा आणि बूट परत न केल्याचा दावा त्याने केला.
मात्र पोलिसांनी हे आरोप फेटाळून लावले आहेत. स्वतःची बाजू मजबूत करण्यासाठी आरोपी स्वतःला इजा करण्याचा प्रयत्न करत असल्याचे पोलिसांनी न्यायालयाच्या निदर्शनास आणून दिले.
मूलभूत सुविधा दिल्या आहेत, चैनीच्या मागण्या नाही-
हुडकेश्वर पोलीस ठाण्याच्या वरिष्ठ पोलीस निरीक्षक अनामिका मिर्झापुरे यांनी सांगितले की, आरोपीला कायद्यानुसार आवश्यक असलेल्या सर्व मूलभूत सुविधा दिल्या जात आहेत. मात्र मऊ गादी, विशेष प्रकारचे जेवण किंवा इतर चैनीच्या सुविधा पुरवणे शक्य नसल्याचे त्यांनी स्पष्ट केले.आरोपी चौकशीत अडथळे निर्माण करत असून सहकार्य करण्यास नकार देत आहे. त्याचे समुपदेशन सुरू असल्याची माहितीही पोलिसांनी दिली.दरम्यान, आरोपी स्वतःला इजा करून घेऊ नये यासाठी पोलिसांकडून त्याच्यावर 24 तास विशेष लक्ष ठेवण्यात येत आहे.
