नागपूर : गिट्टीखदान पोलीस ठाण्याच्या हद्दीतील गायकवाड लेआउट येथे झालेल्या घरफोडीचा गुन्हा उघडकीस आणण्यात पोलिसांना यश आले आहे. या प्रकरणात एका आरोपीला अटक करण्यात आली असून त्याच्याकडून सुमारे साडेतीन लाख रुपयांचा चोरीचा मुद्देमाल जप्त करण्यात आला आहे. गुन्ह्यात सहभागी असलेला अल्पवयीन साथीदार अद्याप फरार असून त्याचा शोध सुरू आहे.
हजारी पहाड येथील गायकवाड लेआउटमधील गायत्री कॉलनीत राहणारे धम्मशील हे ३१ जुलैच्या रात्री कुटुंबासह पुण्याला गेले होते. घर बंद असल्याची संधी साधत अज्ञात चोरट्यांनी घराचे कुलूप तोडून सुमारे साडेतीन लाख रुपयांचे सोन्याचे दागिने व इतर मौल्यवान वस्तूंवर डल्ला मारला.
Gold Rate
Sept 17,2026 - Time 10.30Hrs
तक्रार दाखल होताच गिट्टीखदान पोलिसांनी तपास सुरू केला. गुप्त माहितीच्या आधारे अंबाझरी परिसरात सापळा रचून सागर वर्मा याला ताब्यात घेण्यात आले. चौकशीदरम्यान त्याच्याकडून चोरीची एक दुचाकीही जप्त करण्यात आली. ही दुचाकी पाचपावली परिसरातून चोरी केल्याची कबुली त्याने दिली.
पुढील चौकशीत सागर वर्माने एका अल्पवयीन साथीदारासह गायकवाड लेआउटमधील घरफोडी केल्याची कबुली दिली. त्याच्या निशाणदेहीवरून पोलिसांनी सुमारे साडेतीन लाख रुपयांचा चोरीचा मुद्देमाल हस्तगत केला.
दरम्यान, या गुन्ह्यातील फरार अल्पवयीन आरोपीचा शोध गिट्टीखदान पोलीस घेत असून, त्याला लवकरच ताब्यात घेऊन पुढील कारवाई करण्यात येणार असल्याची माहिती गिट्टीखदान पोलीस ठाण्याचे वरिष्ठ पोलीस निरीक्षक सारंग मिराशी यांनी दिली.
