नागपूर : जाटतरोडी परिसरात पिस्तूल लहरवत गोळीबार करून दहशत निर्माण करणाऱ्या प्रकरणात इमामवाडा पोलिसांनी एका आरोपीला अटक केली आहे. निखिल सावडिया असे अटक करण्यात आलेल्या आरोपीचे नाव असून, त्याच्याकडून मॅगझिनसह पिस्तूल जप्त करण्यात आले आहे. या प्रकरणातील दुसरा आरोपी अद्याप फरार असून, पोलीस त्याचा शोध घेत आहेत.
ही घटना ४ ऑक्टोबरच्या रात्री इमामवाडा पोलीस ठाण्याच्या हद्दीतील जाटतरोडी परिसरात घडली. अमेय धुर्वे हा आपल्या मित्रांसह शीतलामाता मंदिराजवळ बसला असताना मृणाल गजभिये आणि त्याचा साथीदार तक्कू हे चारचाकी वाहनाने तेथे आले. दोघांनी अमेय आणि त्याच्या मित्रांना शिवीगाळ केली, पिस्तूल लहरवले आणि जमिनीवर एक गोळी झाडल्याचा आरोप आहे. त्यानंतर दोघेही घटनास्थळावरून पसार झाले.
या घटनेनंतर पोलिसांनी गुन्हा दाखल करून आरोपींचा शोध सुरू केला. तपासादरम्यान मिळालेल्या गुप्त माहितीच्या आधारे पोलिसांनी हुडकेश्वर येथील आउटर रिंग रोडवरून निखिल सावडिया याला ताब्यात घेतले. त्याच्या झडतीत मॅगझिनसह पिस्तूल आढळून आले. दोन्ही आरोपींवर यापूर्वीही गुन्हे दाखल असल्याची माहिती आहे. फरार आरोपीचा शोध सुरू असून, पुढील तपास इमामवाडा पोलीस करीत आहेत.
