नागपूर : मुंबई उच्च न्यायालयाने राज्यातील न्यायव्यवस्थेत व्यापक प्रशासकीय फेरबदल जाहीर केला असून, एम. एस. आझमी यांची नागपूरचे प्रमुख जिल्हा व सत्र न्यायाधीश म्हणून नियुक्ती करण्यात आली आहे. महाराष्ट्र राज्य विधी सेवा प्राधिकरणाचे सदस्य सचिव म्हणून कार्यरत असलेले आझमी आता नागपूर जिल्हा न्यायालयाची सूत्रे हाती घेणार आहेत.
या फेरबदलात नागपूरचे विद्यमान प्रमुख जिल्हा व सत्र न्यायाधीश एस. सी. मुनघाटे यांची मुंबई उच्च न्यायालयाच्या महाव्यवस्थापक (जनरल मॅनेजर) पदावर बदली करण्यात आली आहे. तसेच, मुंबई उच्च न्यायालयाच्या नागपूर खंडपीठातील उपव्यवस्थापक एम. आर. वाशीमकर यांची नागपूर कामगार न्यायालयाचे न्यायाधीश म्हणून नियुक्ती करण्यात आली आहे.
Gold Rate
Sept 09,2026 - Time 10.30Hrs
मुंबई उच्च न्यायालयाने ५ ऑगस्ट रोजी प्रसिद्ध केलेल्या अधिसूचनेद्वारे राज्यभरातील अनेक वरिष्ठ न्यायिक अधिकाऱ्यांच्या बदल्या व नियुक्त्यांची घोषणा केली. न्यायालयीन प्रशासन अधिक सक्षम, कार्यक्षम आणि गतिमान करण्याच्या उद्देशाने हा निर्णय घेण्यात आल्याचे मानले जात आहे.
अधिसूचनेनुसार, मुंबई लघुवाद न्यायालयाचे प्रमुख न्यायाधीश एस. एल. अणेकर यांची हिंगोलीचे प्रमुख जिल्हा व सत्र न्यायाधीश म्हणून नियुक्ती झाली आहे. तर, मुख्य न्यायमूर्ती कार्यालयातील विशेष अधिकारी ए. एस. शेंडे यांच्याकडे मुंबई शहर दिवाणी व सत्र न्यायालयाच्या प्रमुख न्यायाधीशपदाची जबाबदारी सोपविण्यात आली आहे.
याशिवाय, मुंबई उच्च न्यायालयाचे महाव्यवस्थापक एस. सी. खटी यांची विधी व न्याय विभागाच्या प्रधान सचिवपदी नियुक्ती करण्यात आली असून, मुंबई शहर दिवाणी व सत्र न्यायालयाचे प्रमुख न्यायाधीश एस. एस. अडकर यांची मुंबई लघुवाद न्यायालयाच्या प्रमुख न्यायाधीशपदी बदली करण्यात आली आहे.
हिंगोलीचे प्रमुख जिल्हा व सत्र न्यायाधीश टी. एस. अकाली यांची महाराष्ट्र राज्य विधी सेवा प्राधिकरणाच्या सदस्य सचिवपदी नियुक्ती झाली आहे. तसेच, मुंबई उच्च न्यायालयाचे व्यवस्थापक मोरेश्वर कुलकर्णी यांची दिंडोशी शहर सत्र न्यायाधीश म्हणून नियुक्ती करण्यात आली आहे.
दरम्यान, विधी व न्याय विभागाचे प्रधान सचिव डी. एस. घुमरे, उच्च न्यायालय विधी सेवा समितीचे सचिव शैलेश देशपांडे आणि मुंबई उच्च न्यायालयाचे विशेष कर्तव्य अधिकारी (ओएसडी) जी. पी. देशमुख यांची मुंबई शहर दिवाणी व अतिरिक्त सत्र न्यायाधीश म्हणून बदली करण्यात आली आहे.
राज्यभरातील या व्यापक न्यायिक फेरबदलामुळे न्यायालयीन प्रशासन अधिक परिणामकारक होण्याची अपेक्षा व्यक्त केली जात असून, नागपूरमध्ये एम. एस. आझमी यांच्या नेतृत्वाखाली जिल्हा न्यायालयाच्या कामकाजाला नवी दिशा मिळेल, असा विश्वास व्यक्त केला जात आहे.
