नागपूर : सावकारीच्या नावाखाली गरजू व्यक्तीला कर्जाच्या जाळ्यात ओढून अवाजवी रक्कम वसूल केल्याचा आणि त्यानंतर मालमत्तेच्या कागदपत्रांवर दबाव टाकल्याचा गंभीर आरोप समोर आला आहे. या प्रकरणी बेलतरोडी पोलिसांनी ‘बंटी-बबली’ म्हणून चर्चेत असलेल्या कमलेश हनोते आणि अनिता भारद्वाज यांच्याविरुद्ध गुन्हा दाखल केला आहे.
निवृत्त शिक्षक दिलीप श्रीराम कुंभारे यांच्या तक्रारीनुसार, एप्रिल २०२४ मध्ये त्यांनी दोन लाख रुपयांचे कर्ज घेतले होते. मात्र, या कर्जाच्या बदल्यात तब्बल ६ लाख १० हजार रुपये वसूल केल्याचा आरोप आहे. एवढेच नव्हे, तर वांझरा आणि बेसा परिसरातील दोन प्लॉटच्या कागदपत्रांवरही दबाव आणि धमकीच्या वातावरणात स्वाक्षऱ्या करून घेतल्याचा दावा तक्रारदाराने केला आहे.
तक्रारीनुसार, कर्ज देताना दोन कोरे धनादेश आणि स्वाक्षरी केलेला मुद्रांक कागद घेण्यात आला. त्यानंतर विविध व्यक्तींच्या खात्यांवर ऑनलाइन रक्कम पाठविण्यास सांगण्यात आल्याचेही नमूद आहे.
Gold Rate
Aug 27 ,2026 - Time 10.30Hrs
घरात घुसून धमकी दिल्याचा आरोप-
२५ मे २०२४ रोजी कमलेश हनोते आणि त्याचा साथीदार तक्रारदाराच्या घरी आले. व्याजाची रक्कम न दिल्याचे सांगत पैशांची मागणी करण्यात आली. पैसे न दिल्यास मारहाण करण्याची धमकी देत शिवीगाळ केल्याचा आरोप तक्रारीत आहे. घर खाली करण्यासाठीही दबाव आणल्याचे तक्रारदाराने पोलिसांना सांगितले.
दोन प्लॉटच्या कागदपत्रांवरही डोळा?
तक्रारदाराच्या म्हणण्यानुसार, वांझरा येथील सुमारे १,२५० चौरस फुटांच्या प्लॉटसाठी कागदपत्रे करून घेण्यात आली. त्यानंतर बेसा येथील सुमारे २,३०० चौरस फुटांच्या मालमत्तेबाबतही करारनामा करून घेतल्याचा आरोप आहे.
१० जानेवारी २०२५ रोजी तक्रारदार आणि त्यांच्या कुटुंबीयांना वाहनातून भगवाननगर-अजनी परिसरात नेऊन नोटरीसमोर मालमत्तेच्या करारनाम्यावर स्वाक्षऱ्या करण्यास भाग पाडल्याचा दावाही तक्रारीत करण्यात आला आहे.
हनोतेविरुद्ध आधीच पाच गुन्हे?
उपलब्ध माहितीनुसार, कमलेश हनोते याच्याविरुद्ध नागपूर शहरातील विविध पोलिस ठाण्यांत यापूर्वी पाच गुन्हे दाखल असल्याचे समोर आले आहे. तर अनिता भारद्वाज हिचाही तीन प्रकरणांमध्ये सहभाग असल्याची माहिती आहे. मात्र, पूर्वीच्या प्रकरणांतील व्यक्ती आणि सध्याच्या गुन्ह्यातील अनिता पुरणलाल भारद्वाज हीच व्यक्ती आहे का, याची अधिकृत पडताळणी तपासातून होणार आहे.
बेलतरोडी पोलिसांनी भारतीय न्याय संहितेतील संबंधित कलमांसह महाराष्ट्र सावकारी (नियमन) अधिनियमांतर्गत गुन्हा दाखल केला आहे. फोन-पे व्यवहार, बँक खाती, धनादेश, मुद्रांक कागद आणि दोन्ही प्लॉटशी संबंधित कागदपत्रांची पोलिसांकडून तपासणी केली जाणार आहे.
दोन लाखांच्या कर्जातून ६.१० लाखांची कथित वसुली आणि त्यानंतर दोन प्लॉटच्या कागदपत्रांवर दबाव आणल्याच्या आरोपांमुळे या कथित ‘बंटी-बबली’ जोडीविरोधातील प्रकरणाची आता पोलिस चौकशी निर्णायक ठरणार आहे.
