नागपूर– मानकापूर परिसरात बंद घरात झालेल्या लाखो रुपयांच्या चोरीचा पोलिसांनी छडा लावला आहे. कुटुंबीय काही वेळासाठी घराबाहेर गेल्याची संधी साधत चोरट्याने घरातील सोन्याचे दागिने आणि रोख रक्कम लंपास केली. मात्र ५० ते ६० सीसीटीव्ही कॅमेऱ्यांच्या फुटेजच्या आधारे पोलिसांनी आरोपीचा माग काढत त्याला मध्य प्रदेशातील सिवनी येथून अटक केली. आरोपीकडून ५ लाख ७० हजार रुपयांचा चोरीचा मुद्देमाल जप्त करण्यात आला आहे.
ही घटना मानकापूर पोलीस ठाण्याच्या हद्दीतील बाबा बगदादिया नगर परिसरात घडली. सैय्यद मुजफ्फर अली हे कुटुंबासह घराला कुलूप लावून अवस्थी चौकात शोरमा घेण्यासाठी गेले होते. काही वेळाने ते घरी परतले असता घरातील सामान अस्ताव्यस्त असल्याचे दिसून आले.
बेडरूममधील कपाटातून सोन्याची साखळी, मंगळसूत्र, बांगड्या, कानातील दागिने आणि सुमारे ६० हजार रुपयांची रोकड असा एकूण ६ लाख ६४ हजार रुपयांचा ऐवज चोरीला गेल्याचे समोर आले. घराची सरकती खिडकी तोडून चोरट्याने घरात प्रवेश केल्याचे तपासात निष्पन्न झाले.
त्यानंतर मानकापूर पोलिसांनी परिसरातील तब्बल ५० ते ६० सीसीटीव्ही कॅमेऱ्यांचे फुटेज तपासले. फुटेजच्या आधारे पोलिसांना संशयिताचा माग काढण्यात यश आले. आरोपीची ओळख मध्य प्रदेशातील सिवनी येथील दीपक अतरसिंग झारिया अशी झाली.
पोलिसांच्या माहितीनुसार, आरोपीने चोरीदरम्यान मोबाईल किंवा कोणत्याही इलेक्ट्रॉनिक साधनाचा वापर टाळला होता. आपले ठिकाण पोलिसांना समजू नये, यासाठी त्याने मोबाईलपासून अंतर ठेवले. तो सिवनीहून बसने नागपुरात आला आणि बसनेच चोरीच्या ठिकाणी पोहोचला.
मात्र आरोपीची ही नियोजनबद्ध पद्धतही पोलिसांच्या तपासापासून सुटू शकली नाही. पोलिसांनी सिवनी, मध्य प्रदेश येथून त्याला अटक केली. त्याच्याकडून सुमारे ५ लाख ७० हजार रुपयांचा चोरीचा मुद्देमाल जप्त करण्यात आला आहे. या प्रकरणाचा पुढील तपास मानकापूर पोलीस करीत आहेत.
