मुंबई : महाराष्ट्र प्रदेश काँग्रेस कमिटीची नवी कार्यकारिणी अखेर जाहीर करण्यात आली असून, विशाल मुत्तेमवार यांची उपाध्यक्षपदी नियुक्ती करण्यात आली आहे. ही नियुक्ती काँग्रेसच्या संघटनात्मक पुनर्बांधणीच्या दृष्टीने महत्त्वाची मानली जात आहे.
या नव्या कार्यकारिणीत एकूण 36 जणांचा राजकीय व्यवहार समितीत, तर 16 वरिष्ठ उपाध्यक्ष, 38 उपाध्यक्ष, 5 वरिष्ठ प्रवक्ते, 108 सरचिटणीस, 95 सचिव आणि 87 नेत्यांचा समावेश करण्यात आला आहे.
Gold Rate
30 July 2025
प्रदेशाध्यक्ष हर्षवर्धन सपकाळ यांच्याकडे नेतृत्वाची सूत्रे आल्यापासून जवळपास सहा महिन्यांनंतर ही यादी जाहीर झाली आहे. यामध्ये अनेक जुने आणि अनुभवी नेत्यांना संधी देण्यात आली असली तरी काही नवीन चेहऱ्यांनाही स्थान मिळालं आहे.
या यादीत रमेश चेन्नीथला, मुकुल वासनिक, अविनाश पांडे, रजनी पाटील, माणिकराव ठाकरे, सुशीलकुमार शिंदे, पृथ्वीराज चव्हाण, नाना पाटील यांचाही समावेश आहे. तसेच सतेज पाटील, वडेट्टीवार, वर्षा गायकवाड, धीरज देशमुख, सचिन सावंत, अनंत गाडगीळ यांना महत्त्वाची जबाबदारी देण्यात आली आहे.
प्रवक्त्यांमध्ये अतुल लोंढे, गोपाळ तिवारी यांचाही समावेश असून, श्रीनिवास बिक्कड यांची पुन्हा एकदा माध्यम समन्वयक म्हणून नियुक्ती करण्यात आली आहे. ही कार्यकारिणी आगामी निवडणुकीच्या पार्श्वभूमीवर पक्ष संघटन बळकट करण्यासाठी निर्णायक ठरणार असल्याचे काँग्रेसने स्पष्ट केले आहे.
