नागपूर : टीसीएस कंपनीत नोकरी लावून देणे, कार भाडेतत्त्वावर कंपनीत लावून देणे तसेच कर्ज माफ करून देण्याचे आमिष दाखवत एका तरुणाची 15 लाख 14 हजार रुपयांची फसवणूक झाल्याची घटना बजाजनगर पोलीस ठाण्याच्या हद्दीत उघडकीस आली आहे. या प्रकरणी पोलिसांनी आरोपीविरुद्ध फसवणुकीसह विविध कलमान्वये गुन्हा दाखल करून तपास सुरू केला आहे.
पोलिसांनी दिलेल्या माहितीनुसार, अभ्यंकर नगर येथील 23 वर्षीय ओंकार नरेंद्र सोमेवार हा कार भाडेतत्त्वावर देण्याचा व्यवसाय करतो. व्यवसायाच्या निमित्ताने त्याची भंडारा जिल्ह्यातील तुमसर तालुक्यातील गोवर्धन नगर येथील आर्चिश बडवाईक याच्याशी ओळख झाली होती.
Gold Rate
Sept 10,2026 - Time 10.30Hrs
आरोपीने ओंकारची कार टीसीएस कंपनीत लावून देण्याचे, त्याला टीसीएसमध्ये नोकरी मिळवून देण्याचे तसेच त्याच्या नावावरील कर्ज माफ करून देण्याचे आमिष दाखवले. त्यासाठी आरोपीने ओंकार तसेच त्याच्या आई-वडिलांकडून ऑनलाइन आणि रोख स्वरूपात मिळून 15 लाख 14 हजार रुपये घेतल्याचा आरोप आहे.
मात्र, पैसे घेतल्यानंतर आरोपीने ना नोकरी मिळवून दिली, ना कार कंपनीत लावून दिली, तसेच कर्जही माफ करून दिले नाही. आपली फसवणूक झाल्याचे लक्षात आल्यानंतर ओंकार सोमेवार यांनी बजाजनगर पोलीस ठाण्यात तक्रार दाखल केली.
तक्रारीवरून पोलिसांनी आरोपीविरुद्ध गुन्हा नोंदवून तपास सुरू केला असून, आरोपी अद्याप फरार आहे.
