नागपूर : हिंगणा पोलिसांनी अवैध हातभट्टी दारू निर्मिती व विक्रीविरोधात मोठी कारवाई करत कानोलीबारा परिसरातील एका शेतावर छापा टाकून तब्बल 7 लाख 62 हजार रुपयांचा मुद्देमाल जप्त केला. मात्र, पोलिसांची चाहूल लागताच मुख्य आरोपी घटनास्थळावरून फरार झाला असून त्याचा शोध सुरू आहे.
पोलिसांना गुप्त माहिती मिळाली होती की, कानोलीबारा परिसरात मोठ्या प्रमाणावर हातभट्टी दारूची निर्मिती सुरू आहे. त्यानुसार विशेष पथकाने संबंधित शेतावर छापा टाकला. तपासात प्रशांत अशोक सोमणकर (रा. कानोलीबारा) हा महुआच्या फुलांपासून अवैधरित्या हातभट्टी दारू तयार करत असल्याचे निष्पन्न झाले.
पोलिस घटनास्थळी पोहोचताच आरोपीने आपली विनाक्रमांक स्प्लेंडर दुचाकी आणि मोबाईल फोन तेथेच टाकून पळ काढला.
या कारवाईत पोलिसांनी 220 लिटर हातभट्टी दारू, 6,000 लिटर महुआचा सडवा, 30 ड्रम, दारू निर्मितीसाठी लागणारे साहित्य, विनाक्रमांक स्प्लेंडर दुचाकी आणि मोबाईल फोन असा एकूण 7.62 लाख रुपयांचा मुद्देमाल जप्त केला.
या प्रकरणी हिंगणा पोलीस ठाण्यात महाराष्ट्र दारूबंदी अधिनियम अंतर्गत गुन्हा दाखल करण्यात आला असून फरार आरोपीचा शोध सुरू आहे. पुढील तपास हिंगणा पोलीस करीत आहेत.
