नागपूर : उपराजधानी नागपूरमध्ये रविवारी उशिरा रात्रीपासून सुरू झालेला पावसाचा जोर सोमवारी सकाळपर्यंत सुरूच राहिला. या मुसळधार पावसामुळे शहरवासीयांना उकाड्यापासून मोठा दिलासा मिळाला असला, तरी शहरातील अनेक भागांमध्ये पाणी साचल्याने नागरिकांचे जनजीवन विस्कळीत झाले.
हवामान विभागाचा इशारा : पुढील दोन दिवस ऑरेंज अलर्ट-
Gold Rate
08 Aug 2025
भारतीय हवामान विभागाने (IMD) नागपूरसाठी पुढील दोन दिवसांसाठी ‘ऑरेंज अलर्ट’ जारी केला आहे. शहरात मुसळधार पावसाची शक्यता वर्तवण्यात आली असून नागरिकांनी काळजी घेण्याचे आवाहन करण्यात आले आहे.
खालच्या भागांमध्ये पाणी साचल्याने वाहतूक ठप्प-
सतत सुरू असलेल्या पावसामुळे पडोळे हॉस्पिटल परिसर, छत्रपती चौक, सतगुरू नगर यासह अनेक निचांकी भागांमध्ये रस्ते जलमय झाले आहेत. रस्त्यांवर साचलेल्या पाण्यामुळे शाळा व कार्यालयाकडे निघालेल्या नागरिकांना मोठ्या अडचणींचा सामना करावा लागला.
महापालिका व आपत्कालीन यंत्रणा सज्ज-
नागपूर महानगरपालिकेच्या सर्व यंत्रणा सतर्क झाल्या असून पाणी उपसण्याचे काम युद्धपातळीवर सुरू आहे. अग्निशमन दल आणि आपत्ती व्यवस्थापनाचे पथकही सज्ज ठेवण्यात आले आहे. तसेच वीजपुरवठा खंडित होऊ नये म्हणून महावितरणच्या अतिरिक्त टीम्स तैनात करण्यात आल्या आहेत.
सावध राहण्याचे आवाहन-
हवामान खात्याने पुढील काही तासांमध्ये पावसाचा जोर अधिक वाढण्याची शक्यता वर्तवली आहे. त्यामुळे नागरिकांनी घराबाहेर पडताना खबरदारी घेण्याचे आवाहन प्रशासनाकडून करण्यात आले आहे.
