नागपूर : महाराष्ट्राचे माजी मुख्यमंत्री आणि भाजप नेते देवेंद्र फडणवीस यांच्या विधानसभा निवडणुकीतील विजयाला आता सर्वोच्च न्यायालयात आव्हान देण्यात आलं आहे. काँग्रेसचे उमेदवार प्रफुल्ल गुडधे पाटील यांनी उच्च न्यायालयाच्या निर्णयाविरोधात सुप्रीम कोर्टात याचिका दाखल केली आहे.
नागपूर दक्षिण-पश्चिम विधानसभा मतदारसंघातून फडणवीस विजयी झाले होते. या विजयाविरोधात प्रफुल्ल गुडधे यांनी आधी बॉम्बे उच्च न्यायालयाच्या नागपूर खंडपीठात याचिका दाखल केली होती. मात्र, याचिकाकर्ते याचिकेच्या सुनावणीसाठी अनुपस्थित असल्याने आणि निवडणूक याचिका सादर करण्यासंबंधीची भारतीय निवडणूक कायद्यातील कलम ८१ अंतर्गत प्रक्रिया वेळेत पूर्ण न केल्यामुळे ही याचिका उच्च न्यायालयाने फेटाळून लावली होती.
Gold Rate
Feb 18 th, 2026 - Time 11.45Hrs
या निकालामुळे फडणवीस यांचा विजय अबाधित राहिला होता. मात्र आता गुडधे यांनी हा निकाल सर्वोच्च न्यायालयात आव्हानित केला आहे. मिळालेल्या माहितीनुसार, सुप्रीम कोर्टात या खटल्यात काँग्रेस नेते आणि वरिष्ठ वकील अभिषेक मनु सिंघवी हे गुडधे यांची बाजू मांडण्याची शक्यता आहे.
गुडधे यांचा आरोप आहे की, निवडणूक प्रक्रियेत अनेक अनियमितता झाल्या असून, निवडणूक आयोगाच्या नियमांचे उल्लंघन झाले आहे. त्यामुळे त्यांनी पुन्हा एकदा या निवडणुकीच्या वैधतेवर प्रश्नचिन्ह उपस्थित केलं आहे.
या याचिकेमुळे फडणवीसांच्या राजकीय वाटचालीवर काय परिणाम होतो, याकडे सगळ्यांचे लक्ष लागले आहे.
