नागपूर– शासकीय वैद्यकीय महाविद्यालय व रुग्णालयात (मेडिकल) गुरुवारी सकाळी खळबळ उडाली. अमरावती जिल्ह्यातील नांदगावपेठ येथील ३५ वर्षीय ट्रान्सजेंडर राधिका मोहन जाधव हिचा संशयास्पद मृत्यू झाला. राधिका ही मेडिकलच्या वॉर्ड क्रमांक १७ मध्ये उपचार घेत होती. सकाळी साडेसातच्या सुमारास ती बेडला बांधलेल्या पट्टीच्या सहाय्याने गळफास घेतलेल्या अवस्थेत आढळून आली.
माहितीनुसार, काही दिवसांपूर्वी राधिका चालत्या रेल्वेतून खाली पडली होती. या भीषण अपघातात तिचे दोन्ही पाय गमवावे लागले होते. सुरुवातीला अमरावती येथील इर्विन रुग्णालयात तिच्यावर उपचार सुरू होते. मात्र प्रकृती गंभीर असल्याने २३ एप्रिल रोजी तिला पुढील उपचारासाठी नागपूर मेडिकलमध्ये रेफर करण्यात आले होते.
मेडिकलच्या वॉर्ड क्रमांक १७ मध्ये तिच्यावर उपचार सुरू असताना गुरुवारी सकाळी अचानक हा प्रकार उघडकीस आला. रुग्णालयातील कर्मचाऱ्यांनी तिला संशयास्पद अवस्थेत लटकलेले पाहताच एकच खळबळ उडाली. घटनेची माहिती तत्काळ रुग्णालय प्रशासन आणि पोलिसांना देण्यात आली.
राधिकाची देखभाल रोहित बॉम्बाटे नावाचा युवक करत होता. तोही उपचारादरम्यान तिच्यासोबत रुग्णालयात उपस्थित होता. घटनेनंतर अजनी पोलिसांनी घटनास्थळी धाव घेत मृतदेह ताब्यात घेतला असून शवविच्छेदनासाठी पाठविण्यात आला आहे.
या प्रकरणी अजनी पोलीस आत्महत्या की घातपात, या दोन्ही शक्यतांचा तपास करत आहेत. पुढील तपास पोलीस निरीक्षक नितीन चंद्रराजकुमार यांच्या मार्गदर्शनाखाली सुरू आहे.
