नागपूर : डॉ. बाबासाहेब आंबेडकर यांच्या ऐतिहासिक दीक्षाभूमीचा कायापालट करण्यासाठी ९९१ कोटी रुपयांचा विकास आराखडा प्रस्तावित करण्यात आला आहे. चार टप्प्यांत राबविण्यात येणाऱ्या या प्रकल्पाला राज्य सरकारने तातडीने मंजुरी द्यावी, अशी मागणी करण्यात आली. धम्मचक्र प्रवर्तन दिनाच्या कार्यक्रमात दीक्षाभूमीच्या विकासासोबतच बौद्ध धम्माचा जागतिक संदेश आणि बुद्धांच्या विचारांची वर्तमान काळातील उपयुक्तता यावरही भर देण्यात आला.
डॉ. बाबासाहेब आंबेडकर स्मारक समितीच्या वतीने मंगळवारी दीक्षाभूमी येथे ७० वा धम्मचक्र प्रवर्तन दिन सोहळा आयोजित करण्यात आला होता. या वेळी अधिवक्ता शैलेश नारनवरे यांनी दीक्षाभूमीच्या विकासासाठी मुंबई उच्च न्यायालयाच्या नागपूर खंडपीठात दाखल जनहित याचिकेबाबत माहिती दिली. विकासकामांसाठी ९९१ कोटी रुपयांचा आराखडा असून, त्याची चार टप्प्यांत अंमलबजावणी करण्याचे नियोजन असल्याचे त्यांनी सांगितले. मुख्यमंत्री देवेंद्र फडणवीस यांनी या प्रस्तावाला लवकर मंजुरी द्यावी, अशी अपेक्षाही त्यांनी व्यक्त केली.
जगाला बुद्धांच्या विचारांची गरज-
समितीचे अध्यक्ष भदंत आर्य नागार्जुन सुरेई ससाई यांच्या अध्यक्षतेखाली झालेल्या कार्यक्रमाला म्यानमारचे भदंत वन्ना सिरी महाथेरो प्रमुख पाहुणे म्हणून उपस्थित होते. फ्रान्समधील प्राकुंट बुद्धिस्ट अकादमीचे अध्यक्ष डॉ. टी. धम्म रतन यांनी जागतिक परिस्थितीवर भाष्य करताना बुद्धांच्या विचारांचे महत्त्व अधोरेखित केले. आर्थिक संकटे आणि आंतरराष्ट्रीय आव्हानांनी ग्रासलेल्या जगाला शांतता, सहअस्तित्व आणि मानवी न्यायाचा मार्ग दाखविण्यासाठी तथागत गौतम बुद्धांची शिकवण उपयुक्त ठरू शकते, असे त्यांनी सांगितले. बौद्ध धम्माचा प्रभाव आता आशिया खंडाच्या पलीकडेही वाढत असल्याचे त्यांनी नमूद केले.
दरम्यान, दिल्लीचे भंते करुणाकरण यांनी महाबोधी विहार बौद्धांच्या ताब्यात देण्याची मागणी केली. बौद्ध समाजासाठी स्वतंत्र व्यक्तिगत कायदा असण्याची गरजही त्यांनी व्यक्त केली.
विचार केवळ स्मरणात नव्हे, तर आचरणातही हवेत-
कर्नाटकचे जेसे ठाकपा जिंगपा यांनी बुद्ध आणि डॉ. बाबासाहेब आंबेडकर यांच्या विचारांचे प्रत्यक्ष जीवनात पालन करणे, हेच त्यांना खरे अभिवादन असल्याचे सांगितले. बौद्ध धम्म हा संपूर्ण मानवतेच्या कल्याणाचा मार्ग असल्याचे त्यांनी स्पष्ट केले.
या कार्यक्रमात देश-विदेशातून आलेल्या बौद्ध भिक्खू आणि अनुयायांनी बुद्ध व डॉ. आंबेडकर यांना अभिवादन केले. बेंगळुरूचे जिग्मे सुल्ट्रीम महाथेरो, सारनाथचे डी. रेवतथेरो, अधिवक्ता आनंद फुलझेले आणि स्मारक समितीचे सचिव सुधीर फुलझेले यांच्यासह अनेक मान्यवर उपस्थित होते.
