नागपूर : पांचपावली पोलिसांनी मोठी कारवाई करत गोहत्येसाठी बेकायदेशीररीत्या ठेवण्यात आल्याचा संशय असलेल्या ९ गोवंशाची सुटका केली. या प्रकरणी एका आरोपीविरुद्ध महाराष्ट्र प्राणी संरक्षण अधिनियम व प्राणी क्रूरता प्रतिबंधक कायद्यान्वये गुन्हा दाखल करण्यात आला असून त्याचा शोध सुरू आहे.
पोलिसांनी दिलेल्या माहितीनुसार, रविवारी सकाळी साडेआठच्या सुमारास गस्तीदरम्यान मिळालेल्या गुप्त माहितीच्या आधारे ईंटभट्टी चौक, बंदे नवाज नगर येथील शेख नसीम शेख हकीम कुरेशी यांच्या घरावर छापा टाकण्यात आला.
छाप्यात घरामध्ये ९ गोवंश अरुंद जागेत चारा-पाण्याविना बांधून ठेवलेले आढळले. प्राथमिक तपासात या जनावरांना गोहत्येच्या उद्देशाने ठेवण्यात आल्याचा संशय पोलिसांनी व्यक्त केला. त्यानंतर सर्व गोवंश ताब्यात घेऊन सुरक्षितपणे गोरक्षण केंद्रात पाठविण्यात आले.
या कारवाईत गोवंशासह ₹२ लाख ३० हजारांचा मुद्देमाल जप्त करण्यात आला. आरोपीविरुद्ध संबंधित कायद्यांनुसार गुन्हा दाखल करण्यात आला असून तो सध्या फरार आहे. पांचपावली पोलीस प्रकरणाचा पुढील तपास करीत आहेत.
