नागपूर : काँग्रेस आणि राहुल गांधी यांच्याकडून सातत्याने संवैधानिक संस्थांवर तथ्यहीन आरोप करून त्यांची प्रतिमा मलीन करण्याचा प्रयत्न केला जात असल्याचा आरोप भाजपचे आमदार परिणय फुके यांनी केला. देशाचे संविधान हटवून कम्युनिस्ट विचारसरणीचे संविधान आणण्याचा प्रयत्न सुरू असून, काँग्रेसच्या आंदोलनामागे ‘शहरी नक्षलवाद्यांचे’ डोके असल्याचा दावाही फुके यांनी केला. नागपुरात सोमवारी आयोजित पत्रकार परिषदेत ते बोलत होते.
२०१४ पासून काँग्रेसकडून संवैधानिक संस्थांवर सातत्याने आरोप केले जात असल्याचे फुके म्हणाले. निवडणुकीतील पराभवानंतर ईव्हीएम आणि निवडणूक आयोगावर प्रश्न उपस्थित केले जातात. भारतीय सैन्याच्या शौर्यावरही काँग्रेसने प्रश्नचिन्ह उपस्थित केल्याचा आरोप त्यांनी केला. देशाच्या प्रगतीत अडथळे निर्माण करण्याचा प्रयत्न झाल्यास भाजपकडूनही काँग्रेसविरोधात आंदोलन केले जाईल, असा इशारा त्यांनी दिला.
Gold Rate
Sept 28,2026 - Time 10.30Hrs
SIR प्रक्रियेत सर्व पक्षांना समान संधी-
SIR प्रक्रियेत सहभागी होण्याची समान संधी सर्व राजकीय पक्षांना देण्यात आली होती. मात्र, काँग्रेसने प्रक्रियेत सहभागी होण्याऐवजी निवडणूक आयोगावर आरोप करण्याचा मार्ग स्वीकारल्याचे फुके यांनी म्हटले. मतदार यादीतील दुबार नावे किंवा इतर त्रुटींवर आक्षेप घेण्याचा अधिकार सर्वांना आहे; मात्र यादीतील त्रुटी दाखवण्यासोबतच ती तयार करण्याच्या प्रक्रियेतही सहभागी होणे आवश्यक असल्याचे त्यांनी सांगितले.
पत्रकार परिषदेला भाजपचे शहराध्यक्ष दयाशंकर तिवारी, महामंत्री विष्णू चांगदे, रितेश गावंडे आणि संदीप जाधव उपस्थित होते. तिवारी यांनीही राहुल गांधी यांच्यावर टीका करत, मतदार यादीवर आरोप करण्यापेक्षा ती तयार करण्यासाठी अधिक मेहनत घेण्याची गरज असल्याचे म्हटले. राहुल गांधी यांनी आपल्या पदाला साजेसे वर्तन करावे, असा टोलाही त्यांनी लगावला.
फुके आणि तिवारी यांनी केलेले हे दावे त्यांच्या राजकीय भूमिकेचा भाग असून, या आरोपांवर काँग्रेसची प्रतिक्रिया स्वतंत्रपणे समोर आलेली नाही.
