नागपूर : साडेतीन वर्षांच्या निष्पाप चिमुरडीवर लैंगिक अत्याचार करणाऱ्या वृद्ध आरोपीला सुनावलेली जन्मठेपेची शिक्षा कायम ठेवत मुंबई उच्च न्यायालयाच्या नागपूर खंडपीठाने आरोपीची अपील फेटाळून लावली आहे. या निर्णयामुळे आरोपीला दिलासा मिळण्याची शक्यता पूर्णतः संपुष्टात आली आहे.
न्यायमूर्ती अनिल पानसरे आणि न्यायमूर्ती राज वाकोडे यांच्या खंडपीठाने हा महत्त्वपूर्ण निकाल दिला. ही अमानुष घटना अकोला जिल्ह्यात १० नोव्हेंबर २०१८ रोजी घडली होती. या प्रकरणातील आरोपी यादव अर्जुन डोंगरे (वय ७७) याला ९ जून २०२१ रोजी सत्र न्यायालयाने जन्मठेप आणि तीन लाख रुपयांचा दंड ठोठावला होता.
Gold Rate
Apr 06,2026 - Time 10.30Hrs
या शिक्षेविरोधात आरोपीने उच्च न्यायालयात अपील दाखल केले होते. मात्र, प्रकरणातील पुरावे आणि साक्षीदारांचे जबाब विचारात घेत उच्च न्यायालयाने सत्र न्यायालयाचा निर्णय योग्य ठरवला आणि आरोपीची अपील फेटाळली.
सत्र न्यायालयात अभियोजन पक्षाने एकूण १० साक्षीदार सादर केले होते. याशिवाय वैद्यकीय अहवालातूनही अत्याचार झाल्याचे स्पष्ट झाले होते. त्यामुळे आरोपीनेच हा घृणास्पद गुन्हा केल्याचे सिद्ध झाले.
या प्रकरणात शासनाच्या वतीने अॅड. अनुप बदर यांनी प्रभावी युक्तिवाद करत न्यायालयात बाजू मांडली.
