नागपूर : नागपूर शहर पोलिसांच्या गुन्हे शाखा पथकाने मोठी कारवाई करत भंडारा जिल्ह्यातील खून प्रकरणातील फरार आरोपीला अटक केली आहे. संबंधित आरोपीवर महाराष्ट्र संघटित गुन्हेगारी नियंत्रण कायद्यांतर्गत गुन्हा दाखल असून तो बराच काळ पोलिसांना हवा होता.
अटक करण्यात आलेल्या आरोपीचे नाव विशाल रामचंद्र मानेकर (वय ३६, रा. जरीपटका) असे आहे. पोलिसांच्या माहितीनुसार, अटकेपासून बचाव करण्यासाठी तो वाडी पोलीस ठाण्याच्या हद्दीतील डावलामेटी परिसरात भाड्याने राहत होता.
Gold Rate
Feb 14th, 2026 - Time 11.45Hrs
गुन्हे शाखेला मिळालेल्या गुप्त माहितीनुसार पथकाने वाडी परिसरात सापळा रचून मानेकर याला ताब्यात घेतले. चौकशीदरम्यान त्याने भंडारा जिल्ह्यातील गोबरवाही पोलीस ठाण्यात दाखल असलेल्या खून प्रकरणात आपला सहभाग असल्याची कबुली दिल्याचे पोलिसांनी सांगितले.
या गुन्ह्यात बेकायदेशीर जमाव जमवणे तसेच अग्निशस्त्र आणि धारदार शस्त्रांचा वापर केल्याचा आरोप आहे. सदर प्रकरणात महाराष्ट्र संघटित गुन्हेगारी नियंत्रण कायदा अंतर्गत कारवाई करण्यात आली आहे.
चौकशीत आरोपीचा नागपूर शहरातील जरीपटका आणि गिट्टीखदान पोलीस ठाण्याच्या हद्दीत घरफोडीच्या गुन्ह्यांमध्येही सहभाग असल्याचे उघड झाले आहे.
अटकेनंतर आरोपीला पुढील कायदेशीर कारवाईसाठी गोबरवाही पोलिसांच्या ताब्यात देण्यात आले असून या प्रकरणाचा तपास सुरू आहे.
ही कारवाई पोलीस आयुक्त रविंद्र कुमार सिंगल यांच्या मार्गदर्शनाखाली गुन्हे शाखेच्या वरिष्ठ अधिकाऱ्यांच्या उपस्थितीत करण्यात आली.
