नागपूर : शहरातील भरधाव अवजड वाहनांचा धोका पुन्हा एकदा जीवघेणा ठरला आहे. महाविद्यालयात कर्तव्यावर जाणाऱ्या YCCEच्या महिला प्राध्यापिकेचा अज्ञात ट्रकच्या धडकेत मृत्यू झाला. हिंगणा मार्गावरील झोन चौकात हा भीषण अपघात घडला. या घटनेत ३५ वर्षीय प्रियंका मोरे यांचा दुर्दैवी अंत झाला. या अपघातामुळे परिसरात हळहळ व्यक्त केली जात आहे.
मिळालेल्या माहितीनुसार, प्रियंका मोरे या सकाळी दुचाकीने वानाडोंगरी येथील YCCE महाविद्यालयात ड्युटीवर जात होत्या. त्याचदरम्यान झोन चौकाजवळ एका अज्ञात ट्रकचालकाने त्यांच्या दुचाकीला जोरदार धडक दिली. धडकेची तीव्रता इतकी होती की, प्रियंका गंभीर जखमी झाल्या. अपघातानंतर त्यांना तातडीने शालिनीताई मेघे रुग्णालयात दाखल करण्यात आले. मात्र, डॉक्टरांनी तपासणीनंतर त्यांना मृत घोषित केले.
या प्रकरणी हुडकेश्वर येथील रहिवासी जीवन डेहनकर यांच्या तक्रारीवरून एमआयडीसी पोलिसांनी अज्ञात ट्रकचालकाविरुद्ध गुन्हा दाखल केला आहे. पोलीस उपनिरीक्षक जाधव यांच्या मार्गदर्शनाखाली पुढील तपास सुरू आहे.
विद्यार्थ्यांचे भविष्य घडवण्यासाठी महाविद्यालयाकडे निघालेल्या प्राध्यापिका प्रियंका मोरे यांचा प्रवास झोन चौकातच संपला. त्यांच्या अकाली निधनाने कुटुंबीयांवर दुःखाचा डोंगर कोसळला असून महाविद्यालयीन परिसरातही शोक व्यक्त केला जात आहे.
