नागपूर : गोरेवाडा येथील रेस्क्यू सेंटरमध्ये वाघांची सतत वाढती संख्या आता वन विभागासाठी चिंतेचा विषय ठरू लागली आहे. या पार्श्वभूमीवर वन विभागाने सेंटरमध्ये २० नवे पिंजरे उभारण्याचा निर्णय घेतला आहे. या माध्यमातून जखमी, आक्रमक किंवा मानवी वस्तीच्या आसपास सापडणाऱ्या वाघांना सुरक्षित ठेवण्याची व्यवस्था केली जाणार आहे.
प्रत्येक महिन्याला किमान एक वाघ गोरेवाडा सेंटरमध्ये आणला जातो. हे वाघ बहुधा जखमी, आजारी किंवा मानवांवर हल्ला करणारे असतात. सध्या महाराष्ट्रात वाघांची संख्या ४०० पेक्षा अधिक असून, राज्यातील जंगलांची वहन क्षमता सुमारे ३०० वाघांपुरतीच मर्यादित आहे. परिणामी अनेक वाघ जंगलाबाहेर येत आहेत आणि त्यांच्यात मानवी संघर्षाचे प्रमाणही वाढत आहे.
Gold Rate
04 Aug 2025
सध्या गोरेवाडा सेंटरची क्षमता मर्यादित असून वाढत्या वाघांची योग्य देखभाल करणे कठीण झाले आहे. त्यामुळे वन विभागाने पुढील काही महिन्यांत २० नवे, आधुनिक सुविधा असलेले पिंजरे उभारण्याचा निर्णय घेतला आहे. हे पिंजरे वाघांच्या उपचार, क्वारंटाईन आणि निरीक्षणासाठी उपयोगी ठरणार आहेत.
वन विभागाच्या सूत्रांकडून मिळालेल्या माहितीनुसार, या नव्या पिंजऱ्यांचे बांधकाम कार्य ऑगस्टपासून सुरू होणार असून, ते २-३ महिन्यांत पूर्ण होण्याची शक्यता आहे. या उपक्रमामुळे वाघांची सुरक्षितता तर सुनिश्चित होईलच, पण रेस्क्यू सेंटरचे व्यवस्थापनही अधिक सुलभ होईल.
