नागपूर : ‘सी-20’ परिषदेसाठी करण्यात आलेले नागपूरचे सुशोभीकरण आता ढासळू लागले आहे. शहरात बसविण्यात आलेल्या काही वस्तूंचे नुकसान झाले आहे तर काही वस्तू चोरट्यांनी चोरून नेल्या आहेत. व्हीआयपी रोडवरील नाईट लॅम्पचीही तीच अवस्था आहे. या रस्त्यावर लावलेले सुमारे 118 दिवे चोरट्यांनी चोरून नेले आहेत, असे असतानाही प्रशासन गाढ झोपेत आहे.
काही महिन्यांपूर्वी ‘G-20’ अंतर्गत ‘C-20’ परिषद नागपुरात झाली. या परिषदेसाठी येणाऱ्या परदेशी पाहुण्यांना आकर्षित करण्यासाठी शहरात ठिकठिकाणी सजावट करण्यात आली होती. ज्या मार्गावरून पाहुणे जाणार होते ते मार्ग आकर्षक पद्धतीने सजवण्यात आले होते. कोट्यवधी रुपये खर्च झाले. परिषद संपली आणि हळूहळू या सुशोभिकरणाचा ऱ्हास होऊ लागला. सुशोभीकरणाचा भाग म्हणून व्हीआयपी रोडवर तेजस्वी दिवे लावण्यात आले.
मिळालेल्या माहितीनुसार, वनामती ते अलंकार टॉकीज दरम्यान रस्त्याच्या दुतर्फा 134 हून अधिक दिवे लावण्यात आले होते. या रस्त्याचे सुमारे 118 दिवे खांबांसह चोरट्यांनी उखडून टाकल्याची माहिती सामाजिक कार्यकर्ते मनीष चांदेकर यांनी दिली.
