नागपूर– शहरात वाढत्या वाहन चोरीच्या घटनांमुळे नागरिक त्रस्त असतानाच नागपूर क्राइम ब्रांचच्या युनिट-१ ने मोठी कारवाई करत लाखनी, भंडारा येथील वाहनचोरांच्या टोळीचा पर्दाफाश केला आहे. अत्यंत गुप्त आणि नियोजनबद्ध पद्धतीने राबवलेल्या या ऑपरेशनमध्ये पोलिसांनी १४ चोरीच्या दुचाकींसह तब्बल १३ लाख ५५ हजार रुपयांचा मुद्देमाल जप्त केला.
विश्वासार्ह माहितीच्या आधारे गुन्हे शाखेच्या पथकाने लाखनी येथे सापळा रचत आरोपी पियुष रविंद्र जगनाडे याला विनानंबर प्लेटच्या अॅक्टिव्हासह ताब्यात घेतले. चौकशीत त्याने साथीदार अंशुल सरजारे आणि दीप रामटेके यांची नावे उघड केली. त्यानंतर पोलिसांनी दोघांनाही अटक करत सखोल चौकशी केली.
तपासादरम्यान आरोपींकडून ३ रॉयल एनफिल्ड बुलेट, ८ होंडा अॅक्टिव्हा, पल्सर 220, होंडा युनिकॉर्न आणि होंडा फॅशन प्रो अशा एकूण १४ चोरीच्या दुचाकी जप्त करण्यात आल्या. तसेच दोन मोबाईल फोनही हस्तगत करण्यात आले.
ही वाहने नागपूर शहरातील बजाजनगर, एमआयडीसी, प्रतापनगर, हुडकेश्वर, सोनेगाव, खापरखेडा आणि बोरी पोलीस ठाण्यांमध्ये दाखल वाहन चोरीच्या गुन्ह्यांशी संबंधित असल्याचे तपासात उघड झाले आहे.
संपूर्ण कारवाई पोलीस आयुक्त रवींद्र सिंगल, सहपोलीस आयुक्त नवीनचंद्र रेड्डी, अपर पोलीस आयुक्त (गुन्हे) वसंत परदेशी आणि डीसीपी डिटेक्शन राहुल माखणीकर यांच्या मार्गदर्शनाखाली पार पडली.
गुन्हे शाखा युनिट-१ च्या या धडक कारवाईमुळे वाहनचोरांच्या टोळीला मोठा धक्का बसला असून, नागपूरकरांमध्ये पोलिसांबद्दल पुन्हा विश्वास निर्माण झाला आहे.
