नागपूर : शहरातील अमली पदार्थांविरोधातील मोहिमेला वेग देत अजनी पोलिसांनी ‘ऑपरेशन थंडर’ अंतर्गत मोठी कारवाई करत एका २३ वर्षीय युवकाला अटक केली आहे. आरोपीकडून तब्बल १४ लाख ९० हजार ९५० रुपयांचे एमडी ड्रग्स जप्त करण्यात आले.
पोलिसांनी दिलेल्या माहितीनुसार, पोलीस आयुक्त रवींद्रकुमार सिंगल यांच्या मार्गदर्शनाखाली ही कारवाई करण्यात आली. मिळालेल्या गुप्त माहितीनुसार अजनी पोलिसांच्या तपास पथकाने रविवारी पहाटे ३.५५ ते ५ वाजण्याच्या दरम्यान सावित्रीबाई फुले नगर, गल्ली क्रमांक ६, अण्णाभाऊ साठे मार्ग परिसरातील आदित्य भीमराव तेलगोटे (वय २३) यांच्या घरावर छापा टाकला.
एनडीपीएस कायद्यानुसार आवश्यक प्रक्रिया पूर्ण करून पंचांसमक्ष आरोपी आणि त्याच्या घराची झडती घेण्यात आली. यावेळी घराच्या टेरेसवरील प्लायवूडच्या मागे लपवून ठेवलेले २९० ग्रॅम ५९ मिलिग्रॅम एमडी पावडर पोलिसांनी जप्त केली.
यासोबतच दोन मोबाईल फोनही जप्त करण्यात आले असून एकूण जप्त मालाची किंमत १४.९० लाख रुपयांपेक्षा अधिक असल्याचे पोलिसांनी सांगितले.
प्राथमिक तपासात आरोपी हा आर्थिक फायद्यासाठी एमडी ड्रग्स विक्रीच्या उद्देशाने साठवून ठेवत असल्याची माहिती समोर आली आहे.
याप्रकरणी अजनी पोलीस ठाण्यात एनडीपीएस कायद्यातील कलम ८(क) आणि २२(क) अंतर्गत गुन्हा दाखल करण्यात आला असून आरोपीला अटक करण्यात आली आहे. पुढील तपास सुरू आहे.
या कारवाईत अतिरिक्त पोलीस आयुक्त शिवाजी राठोड, डीसीपी रश्मिता राव, एसीपी नरेंद्र हिवरे यांच्या मार्गदर्शनाखाली अजनी पोलिसांच्या पथकाने सहभाग घेतला.
