नागपूर : अखिल भारतीय आयुर्विज्ञान संस्था (एम्स) नागपूरच्या पदवीधर विद्यार्थ्यांच्या मेसमध्ये दिल्या जाणाऱ्या जेवणात किडे व अळ्या आढळल्याचा गंभीर आरोप विद्यार्थ्यांनी केला आहे. या घटनेमुळे विद्यार्थ्यांमध्ये संतापाची लाट उसळली असून मेस व्यवस्थापनासह संपूर्ण प्रशासनावर प्रश्नचिन्ह निर्माण झाले आहे. संबंधित प्रकाराची पारदर्शक चौकशी करून दोषींवर कठोर कारवाई करावी, अशी मागणी विद्यार्थ्यांनी केली आहे.

बुधवारी दुपारच्या जेवणावेळी काही विद्यार्थ्यांना भाजीमध्ये पूर्णपणे तळलेली अळी (कॅटरपिलर) आढळल्याचा दावा करण्यात आला. एका फळाच्या तुकड्यावर मृत किडा दिसल्याचे, तर दुसऱ्या भाजीमध्ये माशीप्रमाणे वस्तू सापडल्याचेही विद्यार्थ्यांनी सांगितले. मशरूम करीमध्ये ‘स्पंजसारखी’ वस्तू आढळल्याचा आरोपही करण्यात आला आहे. हा प्रकार लक्षात आल्यानंतर काही विद्यार्थ्यांनी जेवण अर्धवट सोडले, तर काहींनी आधीच जेवण केले असल्याचे सांगितले. या संदर्भातील छायाचित्रे आणि संदेश विद्यार्थ्यांच्या व्हॉट्सअॅप गटांवर व्हायरल झाल्याने प्रकरण चांगलेच तापले आहे.

Gold Rate

June 09 2026 - Time 10.30Hrs

Gold 24 KT ₹ 152,700 /-

Gold 22 KT ₹ 1,41,600 /-

Silver/Kg ₹ 2,43,900/-

Platinum ₹ 88,000/-

Recommended rate for Nagpur sarafa Making charges minimum 13% and above

विद्यार्थ्यांच्या मते, मेसमध्ये बसण्याची व्यवस्था अपुरी आहे. सध्या केवळ दोन मोठ्या टेबल्स असून प्रत्येकी सुमारे ७० विद्यार्थ्यांची क्षमता आहे. विद्यार्थ्यांची संख्या लक्षात घेता ही व्यवस्था अपुरी पडत असल्याचा आरोप करण्यात आला आहे. गर्दी, घाईगडबड आणि देखरेखीअभावी अन्नाच्या गुणवत्तेकडे दुर्लक्ष होत असल्याचेही काही विद्यार्थ्यांचे म्हणणे आहे.

दरम्यान, मेसचा करार नुकताच १ फेब्रुवारीपासून नव्या कंत्राटदाराकडे सोपवण्यात आला आहे. नव्या व्यवस्थेमुळे अन्नाची गुणवत्ता सुधारेल, अशी अपेक्षा विद्यार्थ्यांनी व्यक्त केली होती. मात्र, या घटनेनंतर नाराजी अधिकच वाढली आहे.

या संदर्भात एम्सचे डीन (स्टुडंट वेल्फेअर) डॉ. सिद्धार्थ दुबाशी यांनी माध्यमांशी बोलताना सांगितले की, नव्या कंत्राटदारामार्फत सर्व नियमांचे पालन करून मेस चालवली जात आहे. दररोज रात्री स्वयंपाकघर व मेस परिसराची सखोल स्वच्छता केली जाते. ज्या ठिकाणी विद्यार्थी जेवतात, त्याच ठिकाणी विभागप्रमुखही जेवण घेतात. त्यामुळे अन्नात किडे आढळण्यामागे काही शरारत असण्याची शक्यता नाकारता येत नाही, असे त्यांनी म्हटले. अद्याप कोणतीही अधिकृत तक्रार प्राप्त झालेली नसली तरी प्रकरणाची गांभीर्याने चौकशी केली जाईल आणि दोषी आढळल्यास कठोर कारवाई केली जाईल, असेही त्यांनी स्पष्ट केले. या घटनेमुळे देशातील नामांकित वैद्यकीय शिक्षण संस्थांपैकी एक असलेल्या एम्स नागपूरच्या व्यवस्थापनावर प्रश्नचिन्ह उपस्थित झाले असून, पुढील कारवाईकडे सर्वांचे लक्ष लागले आहे.