नागपूर : शहरातील अंबाझरी पोलीस ठाण्याच्या हद्दीत रोडरेजच्या वादातून २० वर्षीय तरुणाची चाकू भोसकून हत्या करण्यात आल्याची धक्कादायक घटना सोमवारी पहाटे घडली. या घटनेमुळे परिसरात मोठी खळबळ उडाली आहे.
मृत तरुणाचे नाव तुषार सुधीर चुटे (वय २०) असे असून तो हुडकेश्वर येथील स्मृतीनगर परिसरातील वैष्णव साई अपार्टमेंटमध्ये राहत होता. तुषारचे वडील सुधीर जगदीश चुटे (वय ५०) यांनी अंबाझरी पोलिसांत तक्रार दाखल केली आहे.
पोलिसांनी दिलेल्या माहितीनुसार, ११ मे रोजी पहाटे २ ते २.३० वाजताच्या सुमारास कॅफे हाऊस चौक ते लॉ कॉलेज चौकादरम्यान, द स्लीप कंपनीच्या शोरूमजवळ ही घटना घडली. तुषार आपल्या दोन मित्रांसह जात असताना पांढऱ्या रंगाच्या अ‍ॅक्टिव्हावरून आलेल्या दोन तरुणांशी किरकोळ कारणावरून वाद झाला.
वाद वाढल्यानंतर आरोपींनी तुषारला शिवीगाळ करत मारहाण करण्यास सुरुवात केली. त्यानंतर अ‍ॅक्टिव्हाच्या मागे बसलेल्या आरोपीने तुषारवर धारदार चाकूने वार केल्याचे पोलिसांनी सांगितले. या हल्ल्यात तुषार गंभीर जखमी झाला.
जखमी अवस्थेत त्याला तातडीने मेयो रुग्णालयात दाखल करण्यात आले. मात्र उपचारादरम्यान डॉक्टरांनी त्याला मृत घोषित केले.
या प्रकरणी अंबाझरी पोलिसांनी दोन अज्ञात आरोपींविरुद्ध भारतीय न्याय संहिता आणि महाराष्ट्र पोलीस कायद्यान्वये खून व मारहाणीचे गुन्हे दाखल केले आहेत. पीएसआय नंदकिशोर पडकोंडे यांनी गुन्ह्याची नोंद केली असून आरोपींचा शोध घेण्यासाठी पोलिसांची पथके रवाना करण्यात आली आहेत. पुढील तपास सुरू आहे.
