नागपूर : पारडी पोलीस ठाण्याच्या हद्दीतील पूनापूर नाल्याजवळ शनिवारी सकाळी ५० वर्षीय महिलेचा मृतदेह आढळल्याने खळबळ उडाली. फुलेशिया नोहर भारती असे मृत महिलेचे नाव आहे.
फुलेशिया या आरा कंपनीत कामाला होत्या. शुक्रवारी सकाळी सुमारे ८ वाजता त्या कामासाठी घरातून बाहेर पडल्या होत्या. मात्र, त्या कामाच्या ठिकाणी पोहोचल्याच नाहीत. त्यानंतर शनिवारी सकाळी पूनापूर नाल्याजवळ त्यांचा मृतदेह आढळून आला.
कुटुंबीयांच्या माहितीनुसार, फुलेशिया यांना दारूचे व्यसन होते आणि त्या अनेकदा काही दिवस घराबाहेर राहत असत. त्यामुळे त्यांच्या मृत्यूमागील नेमके कारण अद्याप स्पष्ट झालेले नाही.
घटनेची माहिती मिळताच पारडी पोलिसांनी घटनास्थळी धाव घेत मृतदेह ताब्यात घेतला. पोलिसांनी आकस्मिक मृत्यूची नोंद करून तपास सुरू केला आहे. महिलेचा मृत्यू नेमका कोणत्या परिस्थितीत झाला, हे शवविच्छेदन अहवाल आणि पोलिसांच्या तपासानंतर स्पष्ट होणार आहे.
