नागपूर – नागपूर शहरातून एक अंगावर शहारे आणणारी घटना समोर आली आहे. धंतोली पोलिस ठाण्याच्या हद्दीतील गजानन नगर भागात कचऱ्याच्या ढिगाऱ्यात एक नवजात मुलगी जिवंत अवस्थेत सापडली. या घटनेने परिसरात खळबळ उडाली असून सध्या या बालिकेवर मेडिकल हॉस्पिटलमध्ये उपचार सुरू आहेत. डॉक्टरांच्या प्राथमिक अहवालानुसार, सुदैवाने बाळाची प्रकृती स्थिर असून ती पूर्णपणे सुरक्षित आहे.
स्थानीय महिलेची सतर्कता आणि मानवता-
बुधवारी सकाळी सुमारे १० वाजताच्या सुमारास एक स्थानिक महिला, जी घरकाम करत असते, नेहमीप्रमाणे कामावर जात असताना तिला गजानन नगरमधील डंपिंग यार्डकडे लक्ष गेलं. तिथे तिला एका नवजात मुलीचा रडण्याचा आवाज ऐकू आला. तिने जवळ जाऊन पाहिलं असता, एका चिमुकलीला वस्त्राविना लावारस अवस्थेत कचऱ्यात टाकलेलं दिसून आलं.
Gold Rate
27 June 2025
त्या महिलेने तत्काळ माणुसकीचे दर्शन घडवत बाळाला उचलले, स्वच्छ करून कपडे घातले आणि धंतोली पोलिसांना याची माहिती दिली.
पोलिसांनी तातडीने सुरू केली चौकशी-
माहिती मिळताच धंतोली पोलिसांनी घटनास्थळी धाव घेतली आणि बाळाला तत्काळ शासकीय वैद्यकीय रुग्णालयात दाखल केलं. डॉक्टरांनी प्राथमिक तपासणीनंतर बाळाची तब्येत स्थिर असल्याचं सांगितलं.
दरम्यान, पोलिसांनी परिसरातील सीसीटीव्ही फुटेज तपासण्यास सुरुवात केली आहे. कोणत्या क्रूर व्यक्तीने हे अमानुष कृत्य केलं, याचा तपास सुरू आहे. पोलिसांनी अज्ञात व्यक्तीविरुद्ध गुन्हा नोंदवून पुढील तपास सुरू केला आहे.या प्रकारामुळे नागपूर शहरात संतापाची लाट पसरली आहे. एक निरागस जीव कचऱ्यात टाकण्याची हृदयद्रावक कृती समाजातील संवेदनशून्यतेचे दर्शन घडवते. मात्र त्या महिलेच्या जागरूकतेमुळे एका निष्पाप जीवाचे प्राण वाचले, ही दिलासादायक बाब म्हणावी लागेल.
