नागपूर : शहरातील शांतिनगर परिसरात १४ वर्षीय अल्पवयीन मुलीशी छेडछाड केल्याचा गंभीर आरोप समोर आला आहे. चॉकलेट आणि वाढदिवसाची भेटवस्तू देण्याचे आमिष दाखवून मुलीशी अनुचित वर्तन करण्याचा प्रयत्न केल्याचा आरोप ३४ वर्षीय आरोपीवर आहे. या प्रकरणी शांतिनगर पोलिसांनी रवि केंद्रे याला अटक केली असून, पॉक्सो कायद्यासह संबंधित कलमांनुसार गुन्हा दाखल केला आहे.
मिळालेल्या माहितीनुसार, आरोपी आणि तक्रारदार मुलीचे कुटुंब एकाच वस्तीत राहतात. १० ऑक्टोबर रोजी आरोपी तक्रारदाराच्या घरी गेला होता. त्यावेळी मुलगी घराच्या खालच्या भागात एकटी असल्याचा आरोप आहे. याच संधीचा फायदा घेत आरोपीने चॉकलेट आणि वाढदिवसाच्या भेटवस्तूचे आमिष दाखवून तिच्याशी अनुचित शारीरिक जवळीक साधण्याचा आणि छेडछाड करण्याचा प्रयत्न केल्याची तक्रार आहे.
घटनेनंतर मुलीने आईला याबाबत माहिती दिली. त्यानंतर पोलिसांत तक्रार दाखल करण्यात आली. तक्रारीच्या आधारे शांतिनगर पोलिसांनी गुन्हा नोंदवून आरोपीला अटक केली. या प्रकरणाचा पुढील तपास सुरू आहे.
