नागपूर : रेडिओच्या दुनियेतील अनुभव, संघर्ष, आठवणी आणि पडद्यामागच्या अनेक न सांगितलेल्या गोष्टींना उजाळा देणारे ‘आरजे – बियॉन्ड द माईक’ हे विशेष चर्चासत्र ‘नागपूर टुडे’च्या ‘संवाद’ या कार्यक्रमाअंतर्गत आयोजित करण्यात आले. या चर्चासत्रात रेडिओ क्षेत्रातील आरजे तेजल, आरजे फरहान आणि आरजे शुभी यांनी सहभागी होत आपल्या रेडिओ प्रवासातील विविध अनुभव मांडले.
रेडिओ क्षेत्रातील संधी, आव्हाने, आरजेची भूमिका, श्रोत्यांशी निर्माण होणारे भावनिक नाते आणि बदलत्या माध्यमविश्वात रेडिओचे महत्त्व यावर यावेळी सविस्तर चर्चा झाली.
आरजे फरहान यांनी आपल्या रेडिओ प्रवासाला ‘नागपूर टुडे’मधून सुरुवात झाल्याचे सांगत याबद्दल कृतज्ञता व्यक्त केली. आपल्या प्रवासाच्या सुरुवातीच्या काळात ‘नागपूर टुडे’कडून मिळालेली संधी आणि प्रोत्साहन याबद्दल त्यांनी आभार मानले. नागपुरात काम करण्याची संधी मिळणे आणि त्यातून रेडिओ क्षेत्रात पुढे जाण्याचा मार्ग खुला होणे हा आपल्या प्रवासातील महत्त्वाचा टप्पा असल्याचे त्यांनी सांगितले.
Gold Rate
Sept 07 ,2026 - Time 10.30Hrs
आरजे तेजल यांनी रेडिओ या विषयाचा अभ्यासक्रमात समावेश करण्याची गरज व्यक्त केली. विद्यार्थ्यांना रेडिओचे माध्यम, त्याचे कामकाज आणि या क्षेत्रातील विविध संधी यांची ओळख शालेय किंवा महाविद्यालयीन स्तरापासून व्हावी, यासाठी रेडिओ हा विषय अभ्यासक्रमात शिकविण्यासाठी समाविष्ट करावा, असे मत त्यांनी मांडले. रेडिओ हे केवळ मनोरंजनाचे माध्यम नसून संवादकौशल्य आणि व्यक्तिमत्त्व विकासासाठीही महत्त्वाचे माध्यम असल्याचे त्यांनी नमूद केले.
आरजे शुभी यांनी रेडिओच्या माध्यमातून श्रोत्यांशी निर्माण होणाऱ्या अदृश्य पण घट्ट नात्याचा उल्लेख केला. आरजे श्रोत्यांना प्रत्यक्ष दिसत नसला तरी त्याचा आवाज त्यांच्या दैनंदिन जीवनाचा भाग बनतो आणि त्यातून एक वेगळे भावनिक नाते तयार होते, असे त्यांनी सांगितले.
रेडिओ क्षेत्रातील आपला प्रवास, अनुभव आणि या माध्यमातून स्वतःची ओळख निर्माण करण्याच्या वाटचालीबद्दलही शुभी यांनी संवाद साधला. आरजेचे काम केवळ सतत बोलत राहणे नसून योग्य मुद्द्यावर प्रभावी आणि मुद्देसूद संवाद साधणे असल्याचे त्यांनी स्पष्ट केले.
या चर्चासत्रातून रेडिओचे बदलते स्वरूप, आरजेचा प्रवास, श्रोत्यांशी असलेले भावनिक नाते आणि नव्या पिढीसाठी रेडिओ क्षेत्रातील संधी यावर महत्त्वपूर्ण चर्चा झाली. माध्यम क्षेत्रातील विद्यार्थी, रेडिओमध्ये करिअर करू इच्छिणारे तरुण आणि रेडिओप्रेमींसाठी हे चर्चासत्र मार्गदर्शक ठरले.
