नागपूर: नागपूर मेट्रोच्या तिसऱ्या टप्प्याबाबत महत्त्वाची माहिती समोर आली आहे. ‘मेट्रो रिच 3.0’ अंतर्गत डिटेल्ड प्रोजेक्ट रिपोर्ट (DPR) तयार करण्याची प्रक्रिया महामेट्रोने सुरू केली असून, ही डीपीआर लवकरच सादर करण्यात येणार आहे.
ही माहिती केंद्रीय मंत्री नितीन गडकरी यांनी राष्ट्रसंत तुकडोजी महाराज नागपूर विद्यापीठाच्या परिसरात आयोजित ‘एडवांटेज विदर्भ – खासदार औद्योगिक महोत्सव’च्या समारोपप्रसंगी दिली. रिच 3.0 अंतर्गत शहराच्या रिंग रोडपर्यंत मेट्रो मार्गिका विकसित करण्याचा प्रस्ताव असून, त्यामुळे नागपूर शहरातील वाहतूक व्यवस्थेला मोठा दिलासा मिळण्याची अपेक्षा व्यक्त करण्यात येत आहे.
नागपूर मेट्रोच्या विस्तारामुळे शहराच्या बाह्य भागांनाही जलद आणि सुरक्षित सार्वजनिक वाहतूक उपलब्ध होणार असून, वाढत्या शहरीकरणाला सामोरे जाण्यासाठी हा प्रकल्प अत्यंत महत्त्वाचा ठरणार आहे.
तसेच, रिंग रोडपर्यंत मेट्रो पोहोचल्यास शहराच्या सर्वांगीण विकासाला चालना मिळेल, असा विश्वासही यावेळी व्यक्त करण्यात आला.
