नागपूर : शहरात अमली पदार्थांच्या अवैध व्यवसायाविरोधात कारवाई करत गुन्हे शाखेच्या अमली पदार्थविरोधी पथकाने पाचपावली पोलीस ठाण्याच्या हद्दीतील ताजनगर-टेका परिसरात छापा टाकून गांजा तस्करीच्या आरोपाखाली तीन जणांना अटक केली. आरोपींकडून १ किलो २०० ग्रॅम गांजासह मोपेड आणि दोन मोबाईल असा एकूण सुमारे २ लाख रुपयांचा मुद्देमाल जप्त करण्यात आला.
मंगळवारी पहाटे पोलिसांचे पथक गस्तीवर असताना इस्रार अन्सारी यांच्या घरासमोरील सार्वजनिक रस्त्यावर मोपेडजवळ उभ्या असलेल्या तीन संशयितांना ताब्यात घेऊन त्यांची झडती घेण्यात आली. यावेळी त्यांच्याकडून सुमारे एक लाख रुपये किमतीचा १ किलो २०० ग्रॅम गांजा आढळून आला. पोलिसांनी गांजासह मोपेड आणि दोन मोबाईल फोन जप्त केले.
या कारवाईत सलमान अब्दुल रहमान, संदीप ऊर्फ भुऱ्या लिल्लारे आणि अतीकुर रहमान मोबीन रहमान अन्सारी यांना अटक करण्यात आली. आर्थिक फायद्यासाठी विक्रीच्या उद्देशाने गांजा जवळ बाळगल्याचा आरोप त्यांच्यावर आहे. याप्रकरणी पाचपावली पोलीस ठाण्यात एनडीपीएस कायद्यांतर्गत गुन्हा दाखल करण्यात आला असून, पुढील तपास सुरू आहे.
