नागपूर : अभियांत्रिकी महाविद्यालयात प्रवेश मिळवून देण्याच्या नावाखाली बनावट कागदपत्रे तयार करून विद्यार्थ्यांना प्रवेश मिळवून दिल्याचा धक्कादायक प्रकार नागपुरात समोर आला आहे. नंदनवन आणि एमआयडीसी पोलिस ठाण्यांत या प्रकरणी दोन स्वतंत्र गुन्हे दाखल करण्यात आले आहेत. प्रकरणाचे गांभीर्य लक्षात घेता तपास गुन्हे शाखेच्या आर्थिक गुन्हे शाखेकडे सोपविण्यात आला आहे.
नंदनवन पोलिस ठाण्यात दाखल प्रकरणात तक्रारदार दीपक मधुकर चिमंत्रवार यांनी आपल्या मुलीला बी.टेक. (कृत्रिम बुद्धिमत्ता) प्रथम वर्षाला प्रवेश मिळवून देण्याचे आमिष दाखवून आरोपींनी १ लाख ३० हजार रुपये घेतल्याचा आरोप केला आहे. प्रवेश प्रक्रियेदरम्यान मुलीची मूळ कागदपत्रे ताब्यात घेऊन बारावीच्या मूळ हस्तांतरण प्रमाणपत्राची कथित बनावट प्रत तयार करण्यात आली. ही प्रत सामायिक प्रवेश प्रक्रियेच्या संकेतस्थळावर अपलोड करून त्याआधारे महाविद्यालयात प्रवेश मिळवून देण्यात आला.
मात्र, दुसऱ्या वर्षाच्या प्रवेशावेळी तंत्रशिक्षण संचालनालयाच्या कार्यालयाकडून कागदपत्रांची तपासणी करण्यात आली. त्यावेळी हस्तांतरण प्रमाणपत्र बनावट असल्याचे समोर आल्याने विद्यार्थिनीचा प्रवेश रद्द करण्यात आला.
दरम्यान, विविध अभियांत्रिकी संस्थांमध्ये सल्लागार, एजंट आणि महाविद्यालयातील काही कर्मचाऱ्यांच्या माध्यमातून अशाच प्रकारे गैरप्रकार झाल्याची शक्यता पोलिस तपासात व्यक्त करण्यात आली आहे.
याच पद्धतीचा दुसरा प्रकार एमआयडीसी पोलिस ठाण्याच्या हद्दीत समोर आला. तक्रारदार गजानन सोपान खर्चे यांनी मुलाला बी.टेक. (कृत्रिम बुद्धिमत्ता) अभ्यासक्रमात प्रवेश मिळवून देण्याच्या नावाखाली आरोपींनी २ लाख ५० हजार रुपये घेतल्याचा आरोप केला आहे. या प्रकरणातही बारावीचे हस्तांतरण प्रमाणपत्र कथितरीत्या बनावट तयार करून प्रवेश प्रक्रियेत वापरण्यात आले. कागदपत्रांच्या पडताळणीनंतर विद्यार्थ्याचा प्रवेश रद्द करण्यात आला.
पोलिसांनी दोन्ही प्रकरणांत भारतीय न्याय संहितेतील विविध कलमांसह माहिती तंत्रज्ञान कायद्यान्वये गुन्हे दाखल केले आहेत. या प्रकरणात आणखी किती जणांचा सहभाग आहे आणि अशा पद्धतीने किती विद्यार्थ्यांना प्रवेश मिळवून देण्यात आला, याचा तपास सुरू आहे.
नंदनवन प्रकरणात पंकज दहरवाल याला पोलिसांनी अटक केली आहे. तर वृषभ धोटे, शीतल धरी, शुभम निंबालकर यांच्यासह अन्य आरोपींचा शोध सुरू आहे.
