नागपूर : पेट्रोल पंपावरील सुमारे पाच लाख रुपयांच्या अपहाराच्या प्रकरणात ताब्यात घेतलेल्या ३० वर्षीय आरोपीचा पोलिसांच्या ताब्यात असताना मृत्यू झाल्याने खळबळ उडाली आहे. हुडकेश्वर परिसरातील पेट्रोल पंपावर सोमवारी ही घटना घडली. अमित भगत (३०, रा. कळंब, जि. यवतमाळ) असे मृत आरोपीचे नाव आहे.
अमितविरुद्ध कळंब पोलिस ठाण्यात पेट्रोल पंपावरील सुमारे पाच लाख रुपयांच्या अपहाराचा गुन्हा दाखल होता. गुन्हा दाखल झाल्यानंतर तो फरार झाला होता. नागपुरात येऊन तो एका पेट्रोल पंपावर व्यवस्थापक म्हणून काम करत असल्याची माहिती कळंब पोलिसांना मिळाली.
Gold Rate
Sept 24,2026 - Time 10.30Hrs
पोलिसांनी त्याच्या पत्नीची चौकशी केल्यानंतर अमित नागपुरात असल्याचे समोर आले. त्यानंतर कळंब पोलिसांचे पथक नागपुरात आले आणि हुडकेश्वर पोलिसांच्या मदतीने सोमवारी सायंकाळी सुमारे चार वाजता त्याला पेट्रोल पंपावरून ताब्यात घेतले.
पोलिसांच्या ताब्यात घेतल्यानंतर अमितने कथितरित्या जवळ असलेले उंदीर मारण्याचे जहर गिळले. पोलिसांनी त्याला काय घेतले, अशी विचारणा केली असता त्याने ते गुटखा असल्याचे सांगितल्याची माहिती आहे. मात्र, काही वेळातच त्याची प्रकृती बिघडली आणि त्याच्या तोंडातून फेस येऊ लागला.
प्रकृती गंभीर होताच पोलिसांनी अमितला तातडीने शासकीय वैद्यकीय महाविद्यालय व रुग्णालयात दाखल केले. मात्र, डॉक्टरांनी तपासणीनंतर त्याला मृत घोषित केले.
पोलिसांच्या ताब्यात असताना आरोपीने जहर कधी आणि कसे घेतले, त्याच्याकडे जहर कुठून आले आणि पोलिसांना माहिती मिळाल्यानंतर त्याला किती वेळात रुग्णालयात नेण्यात आले, यासह विविध बाबींची चौकशी केली जात आहे.
मृतदेहाचे शवविच्छेदन करण्यात येणार असून, त्यानंतर मृत्यूचे नेमके कारण स्पष्ट होण्याची शक्यता आहे. या घटनेमुळे पोलिसांच्या ताब्यातील आरोपींच्या सुरक्षेचा आणि देखरेखीचा प्रश्नही उपस्थित झाला आहे.
