नागपूर : सिटी बस कर्मचाऱ्यांच्या सुरू असलेल्या संपामुळे संपूर्ण शहराची सार्वजनिक वाहतूक व्यवस्था ठप्प झाली असतानाच अखेर मनपा प्रशासनाला मवाळ भूमिका घ्यावी लागली आहे. दोन दिवसांपासून सुरू असलेल्या या आंदोलनात कर्मचाऱ्यांनी आपल्या विविध मागण्यांवर ठाम भूमिका घेतली होती. वाढत्या तणावाच्या पार्श्वभूमीवर मनपा प्रशासनाने अखेर लिखित आश्वासन देत २ दिवसांत अंतिम तोडगा काढण्याचे वचन दिले.
सकाळपासूनच शहरातील सिटी बस डेपो ओस पडले होते. तब्बल ३०० हून अधिक बस डिपोमध्ये उभ्या, तर हजारो प्रवासी काम-धंद्यासाठी, शाळा-कॉलेजांसाठी पर्यायी व्यवस्था शोधताना दिसले. विद्यार्थ्यांपासून नोकरदारांपर्यंत सर्वांनाच मोठ्या गैरसोयींना सामोरे जावे लागले.
Gold Rate
25 Oct 2025
दरम्यान, कर्मचाऱ्यांनी आंदोलन अधिक तीव्र करण्याची चेतावणी दिली होती. जर दिलेल्या वेळेत ठोस तोडगा समोर आला नाही, तर संप आणखी उग्र करण्याचा इशारा त्यांनी दिला आहे. त्यामुळे परिस्थिती हाताळण्यासाठी मनपा परिसरात पोलिस बंदोबस्त वाढविण्यात आला आहे.
प्रशासनाच्या लिखित आश्वासनानंतर संप तात्पुरता मागे घेण्यात आला असला, तरी सिटी बस व्यवस्थेतील कायमस्वरूपी समस्यांवर तोडगा काढण्याची मागणी अधिक आक्रमकपणे पुढे आली आहे.
आता सर्वांचे लक्ष मनपाच्या पुढील पावलांकडे आहे. पुढील दोन दिवसांत काय निर्णायक निर्णय घेतला जातो, यावरच आंदोलनाची पुढची दिशा आणि शहराच्या सार्वजनिक वाहतुकीची स्थिती अवलंबून राहणार आहे.
