नागपूर : नागपूरच्या रस्त्यांवर खड्डे आहेत की खड्ड्यांमध्ये रस्ते शोधायचे, असा प्रश्न उपस्थित करण्याची वेळ पुन्हा आली आहे. अवस्थी नगर चौकातील हल्दीराम आणि एनएल विला समोरील रस्त्याची अवस्था पाहिल्यानंतर शहरातील रस्त्यांच्या देखभालीचा प्रश्न ऐरणीवर आला आहे. या रस्त्यावर ठिकठिकाणी खोल खड्डे पडले असून, दररोज या मार्गावरून ये-जा करणाऱ्या वाहनचालकांना मोठ्या त्रासाला सामोरे जावे लागत आहे.
अवस्थी नगर चौक परिसरातील हा रस्ता मानकापूर रिंगरोडच्या पलीकडील भागांना जोडणारा महत्त्वाचा मार्ग आहे. त्यामुळे या रस्त्यावरून दिवसभर वाहनांची वर्दळ असते. मात्र, महत्त्वाच्या मार्गाचीच अशी दुरवस्था झाल्याने नागरिकांमध्ये नाराजी आहे. वारंवार तक्रारी करूनही परिस्थितीत सुधारणा झालेली नसल्याची तक्रार स्थानिकांकडून केली जात आहे.
रस्त्यावरील खड्ड्यांमुळे वाहनचालकांना प्रवास करताना सतत सावध राहावे लागते. खड्डे चुकवण्याच्या नादात वाहनांचा तोल जाण्याची तसेच अपघात घडण्याची शक्यता आहे. विशेषतः दुचाकीस्वारांसाठी हा मार्ग धोकादायक ठरू शकतो. नागरिकांनी वेळेवर पोहोचायचे तरी कसे, असा प्रश्न या परिस्थितीतून निर्माण होत आहे.
संपूर्ण रस्त्याच्या कामाला वेळ लागणार असेल, तर किमान खड्डे बुजवण्याचे काम तरी तातडीने करता येणार नाही का? असा सवाल उपस्थित होत आहे. मोठ्या दुरुस्तीची प्रतीक्षा करताना नागरिकांना दररोज त्रास सहन करावा लागू नये, यासाठी प्रशासनाने त्वरित पॅचवर्क करून रस्ता वाहतुकीसाठी सुरक्षित करावा, अशी मागणी होत आहे.
आता तरी संबंधित प्रशासन या समस्येची दखल घेणार का? की नागरिकांना आणखी काही काळ याच खड्ड्यांतून मार्ग काढावा लागणार? याकडे परिसरातील नागरिकांचे लक्ष लागले आहे.
