नागपूर : वाठोडा पोलीस ठाण्याच्या हद्दीत एटीएम कार्ड बदलून एका व्यक्तीच्या बँक खात्यातून तब्बल ४४ हजार रुपये काढल्याचा प्रकार समोर आला आहे. एटीएममधून पैसे काढताना मदतीच्या बहाण्याने अज्ञात आरोपीने हातचलाखीने कार्ड बदलले आणि त्यानंतर पाच व्यवहारांतून रक्कम लंपास केली.
दिघोरी-उमरेड मार्गावरील एसबीआयच्या एटीएममध्ये ही घटना घडली. तक्रारदार युवराज नत्थुजी अंडेल (५२) हे पैसे काढण्यासाठी एटीएममध्ये गेले होते. त्यावेळी सुमारे ४० ते ४५ वर्षांचा एक अनोळखी व्यक्ती एटीएममध्ये उपस्थित होता.
अंडेल यांनी पैसे काढल्यानंतर आरोपीने एटीएममधून पावती निघत आहे का, अशी विचारणा केली. बोलण्याच्या बहाण्याने त्याने हातचलाखी करत अंडेल यांचे एटीएम कार्ड बदलले आणि तेथून निघून गेला.
काही वेळातच आरोपीने बदललेल्या कार्डाचा वापर करून अंडेल यांच्या खात्यातून पाच वेळा पैसे काढले. एकूण ४४ हजार रुपये खात्यातून कमी झाल्याचे लक्षात आल्यानंतर त्यांनी वाठोडा पोलीस ठाण्यात तक्रार दाखल केली.
पोलिसांनी अज्ञात आरोपीविरुद्ध संबंधित कलमांनुसार गुन्हा दाखल केला असून त्याचा शोध सुरू केला आहे. एटीएममधील सीसीटीव्ही चित्रण तसेच तांत्रिक माहितीच्या आधारे आरोपीची ओळख पटविण्याचे काम सुरू आहे.
