नागपूर : नागपूर विमानतळाचा विस्तार आणि प्रवाशांची वाढती संख्या यामुळे हवाई वाहतूक मोठ्या प्रमाणात वाढत आहे. मात्र, विमानतळ परिसरातील काही बाबी विमानांच्या सुरक्षिततेसाठी चिंताजनक ठरत असल्याचे समोर आले आहे. विमानतळाच्या परिसरात असलेला मटण बाजार, कचऱ्याचे ढीग आणि उड्डाण मार्गाजवळील उंच बांधकामे यामुळे विमान सुरक्षेला धोका निर्माण होत असल्याचे ग्रुप कॅप्टन (निवृत्त) विजय हरदास यांनी म्हटले आहे.

विमानतळाच्या आसपास असलेल्या मटण बाजारातून निर्माण होणारे अवशेष आणि अस्वच्छतेमुळे पक्ष्यांचा वावर वाढत आहे. मांसाचे अवशेष खाण्यासाठी मोठ्या संख्येने पक्षी विमानतळाच्या दिशेने येतात. काही वेळा हे पक्षी थेट धावपट्टी परिसरात पोहोचत असल्याने विमानांच्या उड्डाण आणि उतरण्याच्या वेळी मोठा धोका निर्माण होऊ शकतो. अलीकडील काळात विमानांना पक्षी धडकण्याच्या दोन घटना घडल्याने हा मुद्दा अधिक गंभीर झाला आहे.

Gold Rate

Aug 25 ,2026 - Time 10.30Hrs

Gold 24 KT ₹ 1 62,100 /-

Gold 22 KT ₹ 1,50,400 /-

Silver/Kg ₹ 2,42,200/-

Platinum ₹ 88,000/-

Recommended rate for Nagpur sarafa Making charges minimum 13% and above

आठवडी बाजार आणि कचऱ्याची समस्याही कायम-
मटण बाजारासोबतच विमानतळ परिसरातील आठवडी बाजार आणि कचरा व्यवस्थापनाचा प्रश्नही सुरक्षेच्या दृष्टीने महत्त्वाचा आहे. बाजारपेठांमधून निर्माण होणारा कचरा योग्य पद्धतीने हटवला गेला नाही, तर पक्ष्यांसह इतर प्राणी विमानतळ परिसराकडे आकर्षित होण्याची शक्यता वाढते. त्यामुळे विमानतळाच्या आजूबाजूचा परिसर स्वच्छ ठेवणे ही केवळ आरोग्याची नव्हे तर हवाई सुरक्षेचीही गरज बनली आहे.

उंच इमारतींमुळेही धोका-
विमानांच्या उड्डाण आणि उतरण्याच्या मार्गाजवळ उभारल्या जाणाऱ्या बहुमजली इमारतींबाबतही प्रश्न उपस्थित करण्यात आला आहे. विमानतळ परिसरातील बांधकामांच्या उंचीवर निश्चित नियम असताना त्यांची काटेकोर अंमलबजावणी होणे आवश्यक आहे. नियमांचे उल्लंघन झाल्यास भविष्यात विमानांच्या सुरक्षित हालचालींवर त्याचा परिणाम होऊ शकतो.

नव्या विकासकामांवरही लक्ष देण्याची गरज-
विमानतळालगतच्या सुमारे २७१ हेक्टर जमिनीवर व्यावसायिक, औद्योगिक आणि निवासी विकास प्रस्तावित आहे. या भागात मोठ्या प्रमाणावर विकास झाल्यास त्याचा विमानतळाच्या सुरक्षेवर होणारा परिणाम आधीच तपासणे आवश्यक आहे. त्याचबरोबर महामार्गालगत उभारण्यात आलेल्या ऑक्सिजन उद्यानामुळे पक्ष्यांची संख्या वाढण्याची शक्यता असल्याने त्याचाही सुरक्षेच्या दृष्टीने विचार करावा लागणार आहे.

सर्व यंत्रणांमध्ये समन्वय आवश्यक-
नागपूर विमानतळावरून दररोज मोठ्या संख्येने देशांतर्गत तसेच आंतरराष्ट्रीय उड्डाणे सुरू आहेत. विमानांची संख्या आणि प्रवासी वाढत असताना सुरक्षेच्या छोट्या त्रुटींकडेही दुर्लक्ष करता येणार नाही. त्यामुळे मटण बाजाराचे स्थलांतर, कचऱ्याची योग्य विल्हेवाट आणि पक्ष्यांचा वावर नियंत्रित करण्यासाठी तातडीने उपाययोजना करण्याची गरज आहे.

विमानतळ परिसरातील सुरक्षेसाठी नागपूर महानगरपालिका, महाराष्ट्र विमानतळ विकास कंपनी, हवाई वाहतूक नियंत्रण यंत्रणा आणि नागरी विमान वाहतूक महासंचालनालयाने संयुक्तपणे काम करणे आवश्यक आहे. नियमित समन्वय बैठका घेऊन विमानतळ परिसरातील संभाव्य धोके ओळखून त्यावर तातडीने उपाय करावेत, अशी मागणी ग्रुप कॅप्टन (निवृत्त) विजय हरदास यांनी केली आहे.