नागपूर : “थट्टामस्करीत…” सुरू झालेला क्षण अखेर एका तरुणाच्या मृत्यूने संपला. धरमपेठ परिसरातील एका मद्यालयात दोन कर्मचाऱ्यांमधील विनोद अचानक जीवघेणा ठरला आणि एका तरुणाला प्राण गमवावे लागले. या धक्कादायक घटनेमुळे शहरात खळबळ उडाली आहे.
सीताबर्डी पोलीस ठाण्याच्या हद्दीतील धरमपेठ परिसरातील टोकियो बारमध्ये गुरुवारी सायंकाळी ही घटना घडली. मृत तरुणाचे नाव अवधेश कुमार असे असून, नेग्गी नावाच्या कर्मचाऱ्याला पोलिसांनी ताब्यात घेतले आहे.
मिळालेल्या माहितीनुसार, बारमध्ये काम करणाऱ्या दोघांमध्ये नेहमीप्रमाणे थट्टामस्करी सुरू होती. याचदरम्यान नेग्गीने काउंटरखाली ठेवलेला स्वयंचलित चाकू बाहेर काढून विनोदाच्या भरात अवधेशकडे फेकला. मात्र हा विनोद क्षणार्धात भीषण दुर्घटनेत बदलला.
फेकलेला चाकू अवधेशच्या छातीत घुसला. गंभीर जखमी अवस्थेत त्याला तातडीने रुग्णालयात दाखल करण्यात आले. मात्र उपचारादरम्यान वैद्यकीय अधिकाऱ्यांनी त्याला मृत घोषित केले.
घटनेनंतर बारमध्ये एकच गोंधळ उडाला. कर्मचारी आणि उपस्थित ग्राहकांमध्ये भीतीचे वातावरण निर्माण झाले. काही क्षणांपूर्वी एकत्र हसणारे मित्र अचानक मृत्यू आणि अटकेच्या छायेत उभे राहिल्याने सर्वजण हादरले.
घटनेची माहिती मिळताच सीताबर्डी पोलिसांनी घटनास्थळी धाव घेत आरोपी नेग्गीला ताब्यात घेतले. ही घटना अपघात आहे की निष्काळजीपणातून घडलेला गुन्हा, याचा तपास पोलीस करीत आहेत.
या घटनेमुळे परिसरात हळहळ व्यक्त केली जात असून, क्षणिक बेफिकीरी किती महागात पडू शकते, याची पुन्हा एकदा जाणीव झाली आहे.
