मालेगाव : नाशिक जिल्ह्यातील मालेगावच्या डोंगराळे परिसरात चार वर्षीय चिमुरडीवर अत्याचार करून तिची हत्या केल्याच्या प्रकरणात न्यायालयाने कठोर निर्णय दिला आहे. या प्रकरणातील आरोपी विजय खैरनार याला मालेगाव अपर जिल्हा व सत्र न्यायालयाने शुक्रवारी फाशीची शिक्षा सुनावली. या निकालामुळे संपूर्ण राज्याचे लक्ष वेधून घेतलेल्या प्रकरणात महत्त्वाचा टप्पा गाठला आहे.
१६ नोव्हेंबर २०२५ रोजी डोंगराळे परिसरात ही धक्कादायक घटना घडली होती. अवघ्या चार वर्षांच्या बालिकेवरील अत्याचार आणि तिच्या हत्येच्या घटनेने परिसरात संतापाची लाट उसळली होती. या प्रकरणातील आरोपीला कठोरात कठोर शिक्षा देण्याची मागणी सातत्याने केली जात होती.
या खटल्यात शासन नियुक्त विशेष सरकारी वकील उज्ज्वल निकम यांनी सरकारची बाजू मांडली. प्रकरणाचे गांभीर्य लक्षात घेता आरोपीला फाशीची शिक्षा देण्याची मागणी करण्यात आली होती. अखेर न्यायालयाने आरोपीला फाशीची शिक्षा सुनावल्याने पीडितेला न्याय मिळाल्याची भावना नागरिकांकडून व्यक्त केली जात आहे.
चिमुरडीवरील अत्याचार आणि हत्येसारख्या गंभीर गुन्ह्यात न्यायालयाने दिलेल्या या निकालाकडे राज्याचे लक्ष लागले होते. या निर्णयामुळे बालकांवरील गंभीर गुन्ह्यांबाबत कठोर शिक्षेचा संदेश गेल्याची प्रतिक्रिया व्यक्त होत आहे.
