मुंबई — कठोर निर्णयक्षमतेसाठी आणि प्रामाणिक कार्यशैलीसाठी प्रसिद्ध असलेल्या वरिष्ठ IPS अधिकारी सदानंद दाते यांची महाराष्ट्राचे नवे पोलीस महासंचालक (DGP) म्हणून निवड झाली आहे. विद्यमान DGP रश्मी शुक्ला 31 डिसेंबर 2025 रोजी निवृत्त होत असल्याने राज्य सरकारने नव्या नेत्याच्या रूपात दाते यांच्यावर विश्वास दाखवला आहे. गृह विभागाने पाठवलेल्या उमेदवारांच्या सूचीतील त्यांचे नाव सुरुवातीपासूनच सर्वाधिक चर्चेत होते.
विविध जबाबदाऱ्या समर्थपणे सांभाळलेला अधिकारी-
1990 च्या बॅचचे अधिकारी असलेल्या दाते यांनी गेल्या तीन दशकांत पोलिस यंत्रणेत अनेक महत्त्वपूर्ण पदांवर काम करताना आपले नेतृत्व सिद्ध केले आहे. आर्थिक गुन्हे तपास, सायबर गुन्हे शाखा, रेल्वे पोलीस, तसेच नवी मुंबई पोलिस अधीक्षक म्हणून त्यांनी अनेक संवेदनशील मोहिमा परिणामकारकपणे हाताळल्या. सध्या ते NIA चे महासंचालक असून त्यांच्या मार्गदर्शनाखाली कमांडो पथकांनी अनेक जोखमीच्या कारवायांमध्ये यश मिळवले आहे. नव्या पदावर त्यांचा कार्यकाळ डिसेंबर 2027 पर्यंत असेल.
Gold Rate
Mar 10, 2026 - Time 11.45Hrs
26/11 हल्ल्यातील धाडसाचा ठसा-
मुंबईवर झालेल्या 26/11 च्या दहशतवादी हल्ल्यात दाते यांनी खऱ्या अर्थाने शौर्य दाखवले होते. कामा रुग्णालयात घुसलेल्या दहशतवाद्यांना रोखण्यासाठी त्यांनी आपला जीव धोक्यात घातला. काही सहकाऱ्यांसह त्यांनी परिस्थितीशी सामना करत अनेकांना सुरक्षित बाहेर काढले. या चकमकीत त्यांना गोळीबाराचाही सामना करावा लागला होता. त्यांच्या या पराक्रमाची दखल अजूनही घेतली जाते.
अनुभव, कर्तव्यनिष्ठा आणि धैर्याची ठाम छाप असलेल्या दाते यांच्या नियुक्तीमुळे राज्य पोलिस दलात नवा आत्मविश्वास निर्माण झाल्याचे मानले जात आहे.
