नागपूर — रिझर्व्ह बँक चौक परिसरात बुधवारी झालेल्या भीषण अपघातात बहीण – भावांचा मृत्यू झाला असून त्यांचे काका गंभीर जखमी झाले आहेत. लग्न समारंभाहून परतताना वेगाने धावणाऱ्या ट्रकने दिलेल्या जोरदार धडकेमुळे ही दुर्दैवी घटना घडली.
मृतांमध्ये रुद्र सुनील सिंगलधुपे (११) आणि सिमरन सुनील सिंगलधुपे (१२) या सख्ख्या भावंडांचा समावेश आहे. तिघे जण नातेवाईकांच्या लग्नाहून दुचाकीने गावाकडे जात होते. रिझर्व्ह बँक चौक ओलांडत असताना ट्रकने अचानक येऊन त्यांच्या दुचाकीला धडक दिली.
Gold Rate
Mar 232026 - Time 10.20Hrs
धडकेनंतर मुलं रस्त्यावर कोसळली. रुद्रचा घटनास्थळीच मृत्यू झाला, तर सिमरनला तातडीने रुग्णालयात हलवण्यात आलं; मात्र गंभीर जखमेमुळे तिचा उपचारादरम्यान मृत्यू झाला. त्यांचे काका जागेश्वरसिंग यांची प्रकृती चिंताजनक असून त्यांना अतिदक्षता विभागात दाखल करण्यात आले आहे.
अपघातानंतर परिसरातील नागरिक आक्रोशित झाले. रिझर्व्ह बँक चौक आणि शेजारील झिरो माईल परिसरात अवजड वाहनांची नियमबाह्य वाहतूक हे अनेक वर्षांपासूनचे प्रश्न आहेत. रात्रीच्या वेळेला काही चालक सिग्नलची पर्वा न करता धोकादायक वेगात वाहनं चालवतात, अशी तक्रार नागरिकांनी केली.
स्थानिक रहिवाशांनी या चौकात वाहतूक नियंत्रणाची कडक अंमलबजावणी करावी, तसेच निष्काळजी चालकांवर तातडीने गुन्हे नोंदवून कठोर कारवाई करावी, अशी मागणी केली आहे. सदर पोलीस या अपघाताचा सखोल तपास करत आहेत.
